Сабаленка адмовілася выступаць без Дзімітрава ў міксце на US Open

• 14.08.2025, 21:37

Беларуска павінна была ў пары з балгарынам пазмагацца за прыз $1 млн.

Першая ракетка свету Арына Сабаленка заявіла, што не плануе выступаць у змешаным парным разрадзе на US Open – апошнім у сезоне турніры «Вялікага шалома» ў Нью-Ёрку. Словы беларускай тэнісісткі прыводзіць TennisUpToDate.

Балгарын Рыгор Дзімітраў, з якім Сабаленка павінна была згуляць у пары, 12 жніўня зняўся з турніру, не паспеўшы аднавіцца ад атрыманай на Уімблдоне траўмы.

«Ёсць некалькі хлопцаў, якія пытаюцца, але не, я так не думаю», – адказала беларуска на пытанне пра магчымасць згуляць з іншым партнёрам.

На пытанне аб прычынах такой пастановы Сабаленка адказала: «Вернасць».

Змешаны турнір з удзелам 16 параў на US Open пройдзе да пачатку спаборніцтваў у адзіночным разрадзе.

Пераможцы міксту атрымаюць $1 млн прызавых.