«Кааліцыя адважных» выставіла чатыры ключавыя патрабаванні аб заканчэнні вайны ва Украіне
- 14.08.2025, 7:51
Ніякіх абмежаванняў для УСУ і магчымасць уступлення ў ЕЗ і NАТО.
«Кааліцыя адважных» выступае супраць таго, каб УСУ мелі нейкія абмежаванні ў рамках будучай мірнай угоды паміж РФ і Украінай. Таксама Масква не павінна мець права вета на шляху Украіны ў ЕЗ і NATO.
Пра гэта паведамляе РБК-Украіна са спасылкай на заяву, апублікаваную на сайце брытанскага ўрада.
Там адзначылі, што паміж «кааліцыяй адважных» з удзелам прэзідэнта Украіны Уладзіміра Зяленскага і віцэ-прэзідэнтам ЗША Джэй Дзі Вэнсам, а таксама прэзідэнтам ЗША Дональдам Трампам - прайшла віртуальная сустрэча.
Лідары Францыі, Нямеччыны і Брытаніі віталі намаганні прэзідэнта Трампа ў спыненні забойстваў і вайны, развязанай Расеяй, а таксама дасягненні справядлівага і трывалага міру.
«Яны (лідары - рэд.) ясна далі зразумець, што шлях да міру ва Украіне не можа быць вызначаны без удзелу Украіны. Неабходна працягваць падыход, які спалучае актыўную дыпламатыю, падтрымку Украіны і ціск на Расею», - сказана ў заяве.
«Кааліцыя адважных» падкрэсліла, што дыпламатычная пастанова павінна абараняць жыццёва важныя інтарэсы як бяспекі Украіны, так і бяспекі Еўропы.
Таксама лідары паўтарылі шэраг ключавых патрабаванняў, якія павінны быць падчас урэгулявання расейска-ўкраінскай вайны.
Па-першае, змястоўныя перамовы могуць мець месца толькі ў кантэксце спынення агню або працяглага і значнага спынення баявых дзеянняў.
Па-другое, санкцыі і больш шырокія эканамічныя меры ў ціску на вайсковую эканоміку РФ павінны быць узмоцненыя. Так павінна быць у выпадку, калі Масква не пагодзіцца на спыненне агню падчас перамоў на Алясцы.
Па-трэцяе, «кааліцыя адважных» падкрэсліла, што міжнародныя межы не павінны змяняцца сілай.
І ў чацвёртым пункце гаворка ідзе пра бяспеку. Украіна павінна мець надзейныя і пераканаўчыя гарантыі бяспекі для эфектыўнай абароны свайго суверэнітэту і тэрытарыяльнай цэласнасці.
Кааліцыя падкрэсліла, што гатовая адыгрываць актыўную ролю, у тым ліку згодна з планамі тых, хто гатовы разгарнуць сілы падтрымкі ў краіне пасля спынення баявых дзеянняў
«Не павінна быць ніякіх абмежаванняў на ўзброеныя сілы Украіны ці яе супрацоўніцтва з трэцімі краінамі. Расея не можа мець права вета на шляху Украіны да ўступлення ў ЕЗ і NATO», - гаворыцца ў заяве.
Таксама «кааліцыя адважных» пацвердзіла, што працягне шчыльна супрацоўнічаць з Трампам, а таксама Зяленскім і ўкраінскім народам «дзеля справядлівага і трывалага міру ва Украіне».