Трамп прапанаваў правесці сустрэчу Пуціна і Зяленскага адразу пасля Аляскі

• 13.08.2025, 20:14

Прэзідэнт ЗША папярэдзіў, што, калі «не атрымае жаданых адказаў», другой сустрэчы не будзе.

Прэзідэнт ЗША Дональд Трамп заявіў, што хацеў бы, каб пасля ягонай сустрэчы з расейскім калегам Уладзімірам Пуціным адразу ж адбыўся трохбаковы саміт – паміж ім, Пуціным і ўкраінскім лідарам Уладзімірам Зяленскім.

«Калі першая сустрэча пройдзе нармальна, я хацеў бы амаль адразу ж правесці другую сустрэчу паміж Пуціным, Зяленскім і мной, калі яны захочуць, каб я там прысутнічаў», – сказаў кіраўнік Белага дому.

Ён папярэдзіў, што, калі «не атрымае жаданых адказаў», другой сустрэчы не будзе.

На пытанне, ці будуць наступствы для Расеі, калі Пуцін не пагодзіцца спыніць агонь у пятніцу (на гэты дзень запланаваны саміт прэзідэнтаў ЗША і Расеі на Алясцы), амерыканскі лідар адказаў: «Будуць вельмі сур'ёзныя наступствы».