Названы рэйтынг краін паводле якасці жыцця

• 12.08.2025, 15:22

Дзе знаходзіцца Беларусь?

Амерыканскі бізнэс-часопіс CEOWORLD Magazine апублікаваў абноўлены рэйтынг краін з найлепшай якасцю жыцця ў 2025 годзе.

Усяго ў даследаванні былі прааналізаваны 196 дзяржаў. Пры гэтым улічаны звесткі аб сітуацыі ў эканоміцы, ахове здароўя, інфраструктуры, адукацыі, узроўні свабоды і абароны правоў чалавека.

У першую тройку рэйтынгу якасці жыцця ўвайшлі Швайцарыя, Нарвэгія і Ісландыя. За імі ідуць Ганконг, Швэцыя, Данія, Нямеччына, Ірландыя, Сінгапур і Аўстралія.

Экспэрты адзначаюць: большасць пазіцыі ў першай дзясятцы займаюць еўрапейскія краіны, што паказвае на ўстойлівасць іх сацыяльных сістэм, развітую інфраструктуру і высокі ўзровень даверу да дзяржаўных інстытутаў.

Пры гэтым Ганконг, Сінгапур і Аўстралія пацвярджаюць, што высокі індэкс магчымы і за межамі Еўропы – пры ўмове моцнага медыцынскага сектара, лічбавых развязанняў і бяспекі.

Найлепшы індэкс якасці жыцця на постсавецкай прасторы ў Літвы - яна на 39-м месцы. На 20 пазіцый ніжэй знаходзіцца Расея.

Недалёка размясціліся Грузія (63), Арменія (78). Паміж імі знайшлося месца Беларусі. Наша краіна на 72-й пазіцыі.