Грошы на барацьбу са стыхіямі пойдуць на руйнаванне будынка «Беларусьфільма»

• 11.08.2025, 15:44

Мільёны з бюджэту сыходзяць на патрэбы прапагандысцкай фабрыкі.

Пастанова ўрада з'явілася на Нацыянальным прававым інтэрнэт-партале.

Урад абавязаў Міністэрства фінансаў выдаць да 2,5 млн рублёў на аплату выдаткаў «Беларусьфільма» для руйнавання аварыйнага будынка былога цэха апрацоўкі плёнкі і ўтылізацыі будаўнічых адкідаў з рэкультывацыяй зямлі. Грошы загадана ўзяць з бюджэтных сродкаў, прадугледжаных для фінансавання выдаткаў, звязаных са стыхійнымі бедствамі, аварыямі і катастрофамі.

Як адзначае Радыё Свабода, урад нярэдка пераразмяркоўвае выдаткі на працягу года пасля ўхвалення дзяржбюджэту. Ва ўмовах дэфіцыту часцей за ўсё фінансаванне павялічваецца за кошт сродкаў, выдадзеных на абслугоўванне замежнай дзяржаўнай пазыкі. З гэтай крыніцы павялічваліся заробкі ў лясной гаспадарцы, фінансаваліся дадатковыя меры кібербяспекі для Дзяржаўнага мытнага камітэта, браліся грошы на капітальны рамонт гідраметэаралагічных аб'ектаў для Мінпрыроды, дзяржаўных СМІ і гэтак далей.

У 2020 годзе за кошт сродкаў, выдадзеных на барацьбу са стыхіямі, фінансавалі «барацьбу з COVID-19».