Алег Белаколас: Расейцы больш не могуць гэта хаваць
- 11.08.2025, 18:38
Нават у асяроддзі Пуціна ёсць тыя, хто выступае супраць вайны.
Адзін з самых даўніх паплечнікаў Пуціна, намеснік кіраўніка адміністрацыі расейскага кіраўніка Дзмітрый Казак выступіў супраць поўнамаштабнага ўварвання ва Украіну і папярэдзіў аб катастрафічных наступствах.
Пра што гаворыць той факт, што нават такія блізкія да Пуціна чыноўнікі выступілі супраць вайны? Пра гэта сайт Charter97.org пагаварыў з дырэктарам Цэнтра даследаванняў Нацыянальнай стойкасці ў Кіеве, экс-дарадцам Пасольства Украіны ў Канадзе і Кеніі Алегам Белакалосам:
- Пакрысе назапашваюцца ўнутраныя складанасці ў самой Расеі, мы бачым пагаршэнне эканамічнай сітуацыі, дэмаграфічныя праблемы, нястачу працоўнай сілы. Прычым не стае кіроўцаў, інжынераў, медработнікаў. Гэта ўжо становіцца цяжка хаваць. Плюс - міграцыйнае напружанне. Усё гэта не можа не ўплываць на настроі, якія існуюць у грамадстве.
Зразумела, што на Крэмль гэта пакуль ніяк не ўплывае. Але, мабыць, уплывае на тых людзей, якія знаходзяцца ў арбіце Крамля і разумеюць, што ўсё гэта нікуды не дзенецца. Вайна з суседам, развязаная пад надуманымі падставамі, абсалютна шкодная для інтарэсаў нармальнай краіны, і рана ці позна яна скончыцца крахам для самога агрэсара.
Людзі, якія, магчыма, засталіся разумнымі (калі так можна сказаць), гэта разумеюць, але баяцца казаць пра гэта ўголас. А тут, напэўна, проста «прарвала».
- Хто яшчэ з атачэння Пуціна, можа падзяляць антываенную пазіцыю, хай і непублічна?
- Відавочна, што людзі, занятыя практычнымі пытаннямі функцыянавання эканомікі, бачаць тыя расколіны і тэндэнцыі, пра якія я сказаў. Таксама гэта могуць быць людзі, звязаныя з медыцынай. Нягледзячы на цэнзуру, інфармацыя прасочваецца ў рэгіянальныя СМІ. Напрыклад, паведамляецца, што ўкамплектаванасць некаторых шпіталяў упала да 50%. Гэта немагчыма цалкам схаваць.
Ёсць і тыя, хто ўцягнуты ў практычнае кіраванне ў рамках дзяржаўнай або калядзяржаўнай сістэмы, і яны выдатна бачаць сітуацыю.
- Ці атрымаецца аяроддзю Пуціна паўплываць на ягоную пазіцыю?
- Не думаю, што яны змогуць нейкім чынам змяніць ягоную пазіцыю. Пуцін і ягонае найбліжэйшае кола загналі сябе ў спіраль супрацьстаяння. З расейскага боку ўжо столькі загінулых, што яны не могуць адыграць назад.
Тыя, хто мае ўласнае меркаванне, напалоханыя паказальнымі рэпрэсіямі, якія мы назіраем пасля 2022 года. Усе разумеюць, што кожны нязгодны можа трапіць пад каток бяздумнай рэпрэсіўнай машыны, якая заўсёды існавала ў гэтай частцы свету.
Таму я не думаю, што асяроддзе Пуціна зможа хоць неяк паўплываць на ягоны пункт гледжання.