Вэнс: Трамп не ўпэўнены ў поспеху перамоў з Пуціным на Алясцы

• 10.08.2025, 19:47

Але лічыць неабходным "паспрабаваць".

Дональд Трамп не ўпэўнены ў поспеху маючых адбыцца перамоў з Уладзімірам Пуціным на Алясцы, але лічыць неабходным "паспрабаваць". Пра гэта заявіў віцэ-прэзідэнт ЗША Джэй Ды Вэнс у інтэрв'ю Fox News.

Cа слоў Вэнс, кіраўнік дзяржавы сказаў яму: "Можа быць, спрацуе. Можа быць, не. Але варта паспрабаваць". Віцэ-прэзідэнт дадаў, што дамоўленасць аб гэтай сустрэчы стала "прарывам для амерыканскай дыпламатыі".

Ён таксама зазначыў, што не лічыць прадуктыўнай ідэю правесці перамовы Уладзіміра Пуціна і Уладзіміра Зяленскага да сустрэчы прэзідэнтаў РФ і ЗША. Пры гэтым ён дадаў, што Вашынгтон працягвае весці дыялог з Кіевам, у ім бярэ ўдзел у тым ліку дзяржсакратар Марка Рубіё.

Паводле інфармацыі CNN, прэзідэнт Украіны можа наведаць Аляску ў дні правядзення перамоў Уладзіміра Пуціна і Дональда Трампа. Крыніцы сцвярджаюць, што ён можа ўзяць удзел у некаторых мерапрыемствах саміту, але толькі пасля сустрэчы амерыканскага і расейскага лідараў.