Мерц: Зяленскі павінен быць прыцягнуты да сустрэчы Трампа і Пуціна

• 10.08.2025, 19:16

Са слоў канцлера ФРГ, сустрэча не павінна праходзіць за спінамі ўкраінцаў і еўрапейцаў.

Нямеччына чакае, што прэзідэнт Украіны Уладзімір Зяленскі наведае сустрэчу паміж прэзідэнтам ЗША Дональдам Трампам і дыктатарам РФ Уладзімірам Пуціным, якая запланавана на пятніцу, 15 жніўня.

Аб гэтым заявіў канцлер ФРГ Фрыдрых Мерц у эфіры тэлеканала ARD, паведамляе DW.

«Мы спадзяёмся і мяркуем, што ўрад Украіны і прэзідэнт Зяленскі будуць прыцягнутыя да гэтай сустрэчы», - заявіў Мерц.

Ён назваў непрымальным тое, калі "за спінамі еўрапейцаў, за спінамі ўкраінцаў абмяркоўваюцца ці нават вырашаюцца тэрытарыяльныя пытанні паміж Расеяй і Амерыкай".

Таксама канцлер Нямеччыны распавёў, што ў нядзелю, 10 жніўня, ён правядзе тэлефонную размову з Трампам.

Мерц выказаў надзею на тое, што падчас сустрэчы ўдасца дасягнуць прарыву, найперш што да спынення агню і мірных перамоў.