Axios: Лонданскія перамовы прынеслі значны прагрэс плану Трампа што да Украіны

• 10.08.2025, 10:11

Амерыканскі чыноўнік раскрыў падрабязнасці.

Пасля шматгадзінных перамоў у Лондане стораны дасягнулі значнага прагрэсу ў рэалізацыі плана амерыканскага лідара Дональда Трампа па ўрэгуляванні вайны ва Украіне.

Пра гэта паведаміў журналіст Axios Барак Равід у сацсетцы X.

Равід са спасылкай на амерыканскага чыноўніка паведаміў, што сённяшнія сустрэчы ў Лондане прынеслі значны прагрэс у рэалізацыі плана Дональда Трампа па ўрэгуляванні вайны паміж Расеяй і Украінай.

«Амерыканскі чыноўнік паведаміў мне: «Сённяшнія шматгадзінныя сустрэчы прынеслі значны прагрэс на шляху да дасягнення мэты прэзідэнта Трампа - пакласці канец вайне ва Украіне напярэдадні будучай сустрэчы прэзідэнта Трампа і прэзідэнта Пуціна на Алясцы», - напісаў журналіст.