Беларусь стварае брыгаду спецназаўцаў ля мяжы з Украінай

• 1.08.2025, 15:58

Ужо сфармаваны адзін з батальёнаў.

У Беларусі пачалі фармаваць новую брыгаду сіл спецаперацый войска, яна будзе базавацца ў Гомельскай вобласці, паведаміў камандзір сіламі спецыяльных аперацый Узброеных Сіл Беларусі Вадзім Дзенісенка.

Ён растлумачыў, што гэтая пастанова была прынятая для ўзмацнення паўднёвага адцінку мяжы. А на поўдні Беларусь мяжуе з Украінай.

«На сённяшні дзень гэта самы, так бы мовіць, неспакойны кірунак, які падтрымлівае нас усіх у тонусе. Таму была прынятая пастанова аб стварэнні там асобнай дэсантна-штурмавой брыгады», - сказаў Дзенісенка ў інтэрв'ю прапагандысцкаму тэлеканалу «Первый инфармационный».

Ён таксама паведаміў, што яе фармаванне ўжо пачалося. Сфармаваны адзін з батальёнаў.

«Да канца гэтага года ён ужо будзе як баявая адзінка», - дадаў камандзір ССА.

Гаворачы аб планаваным месцазнаходжанні новай брыгады, Дзенісенка ўдакладніў, што гэта будзе Гомельская вобласць, 37-я асобная дэсантна-штурмавая гвардзейская брыгада.