Зяленскі аспрэчыў фэйкі расейцаў пра Часіў Яр

• 31.07.2025, 21:48

УСУ трымаюць пазіцыі.

Прэзідэнт Украіны Уладзімір Зяленскі паведаміў пра сітуацыю на Пакроўскім кірунку, дзе прадаўжаюцца жорсткія сутыкненні з акупантамі.

«Нашы падраздзяленні трымаюць пазіцыі, асабліва ў раёнах Пакроўска і Дабраполля. Там вораг увесь час спрабуе прарвацца, задзейнічае дыверсійна-выведныя групы, але ўкраінскія воіны паспяхова іх знішчаюць», – адзначыў Зяленскі ў вечаровым відэазвароце.

Зяленскі заявіў, што тактыка ворага заключаецца ў спробах замацавацца ў прыфрантавых гарадах, аднак кожная такая спроба атрымлівае жорсткі адпор. Прэзідэнт таксама аспрэчыў фэйкі расейскай прапаганды пра Часіў Яр, назваўшы гэта чарговай інфармацыйнай атакай.

«На ўсіх кірунках – Данецкім, Сумскім, Харкаўскім – украінскае войска паспяхова стрымлівае ворага. Гэта барацьба не толькі за тэрыторыі, але і за права ўкраінцаў на жыццё», – заявіў Зяленскі.

Акрамя таго, у Офісе прэзідэнта Украіны адбыўся брыфінг для амбасадараў краінаў ЕЗ. Упаўнаважаны ў санкцыйнай палітыцы выказаў канкрэтныя прапановы для ўзмацнення ціску на Расею. Дыпламатам таксама паказалі абломкі расейскіх ракетаў і дронаў-камікадзэ «Шахед», якія нядаўна ўдарылі па цывільных аб'ектах у Кіеве.

«Ніводная з гэтых ракетаў не была б сабраная без замежных кампанентаў. Задача партнёраў – перакрыць пастаўкі праз усе шэрыя схемы», – адзначыў прэзідэнт.

Таксама Зяленскі абмеркаваў з урадам імплементацыю прынятых законаў і падрыхтоўку новых. Адным з прыярытэтаў названы запуск інстытуту ваеннага амбудсмэна – адпаведны законапраект ужо гатовы да разгляду ў жніўні.

«Дзякуй кожнаму, хто дапамагае нам змагацца – на фронце, ва ўладзе, у міжнародных партнёрствах», – падсумаваў прэзідэнт.