Абраны прэзідэнт Польшчы і Зяленскі правялі першую размову

• 31.07.2025, 14:23

Украіна, якая змагаецца супраць імперскай Расеі, можа разлічваць на падтрымку.

Абраны прэзідэнт Польшчы Караль Наўроцкі і прэзідэнт Украіны Уладзімір Зяленскі правялі першую тэлефонную размову.

Пра гэта ў сваім X заявіў прэс-сакратар Наўроцкага Рафал Ляшкевіч.

Прэс-сакратар паведаміў, што размова адбылася з ініцыятывы Зяленскага, які павіншаваў Караля Наўроцкага з перамогай на прэзідэнцкіх выбарах.

"Караль Наўроцкі падкрэсліў, што супрацоўніцтва паміж дзвюма краінамі павінна базавацца на ўзаемнай павазе і шчырым партнёрстве... Расея - гэта неаімперская, каланіяльная дзяржава пад кіраўніцтвам вайсковага злачынцы Уладзіміра Пуціна. Таму Украіна, якая змагаецца супраць крамлёўскага рэжыму, можа разлічваць на падтрымку Польшчы", - гаворыцца ў ягонай заяве.

Адной з цэнтральных тэм размовы была гістарычная палітыка.

"Караль Наўроцкі падкрэсліў, што ён з'яўляецца голасам народа, які патрабуе змены падыходу Украіны да важных і дагэтуль нявырашаных гістарычных пытанняў. Гэта павінна змяніцца. Абраны прэзідэнт сказаў, што гістарычныя пытанні будуць тэмамі далейшых размоў з прэзідэнтам Украіны”, – распавёў спікер.

Зяленскі са свайго боку яшчэ не паведамляў пра размову.

Перад гэтым Зяленскі павіншаваў Наўроцкага з перамогай на выбарах у публічным допісе ў пачатку чэрвеня. Наўроцкі ў адказ выказаў надзею на працяг шчыльнага партнёрства з Украінай і падкрэсліў важнасць развязання складаных гістарычных пытанняў.

Інаўгурацыю Караля Наўроцкага, якога падтрымлівае апазіцыйная «Права і справядлівасць», прызначылі на 6 жніўня.