У Камбоджы правялі рытуал чорнай магіі супраць тайскага генерала

• 30.07.2025, 20:15

Відэа.

У Камбоджы шаманы правялі рытуал чорнай магіі супраць тайскага генерала Бунсіна Падкланга, які камандаваў войскамі падчас канфлікту дзвюх краінаў, піша The Bangkok Post. На кадрах відаць, як удзельнікі праводзяць цырымонію, якая ўключае сімвалічны гвалт над фатаграфіяй тайскага генерала. Песні заклікаюць да больш хуткай смерці генерала.

Рытуал пачынаецца з традыцыйнай музыкі і танцаў перад мужчынам у белым адзенні. Удзельнікі рытуалу стаяць перад вялікай выявай камандзіра тайскага войска. У канцы шаман з трызубцам наносіць колючыя ўдары па фатаграфіі.

Іншы шаман дзейнічае паводле аналагічнай схемы, танчачы, перш чым ударыць па малюнку. Потым некалькі іншых удзельнікаў рытуалу па чарзе здзяйсняюць сімвалічныя напады на фатаграфію. Рытуал заканчваецца спаленнем фатаграфіі генерала.

Як адзначае газета, пазней генерал Бунсін Падкланг запэўніў людзей, што ён жывы і здаровы.

Напружанасць паміж Тайландам і Камбоджай нарастала цягам апошніх месяцаў, але 24 ліпеня перарасла ва ўзброеныя сутыкненні на мяжы. Кожны з бакоў абвінаваціў іншы ў эскалацыі канфлікту. Тайланд закрыў памежныя пераходы са свайго боку. Камбоджа ў адказ заявіла пра паніжэнне ўзроўню дыпламатычных стасункаў з Тайландам, высылку амбасадара каралеўства і адклікала дыпламатаў з амбасады ў Тайландзе.

28 ліпеня прэм'ер-міністр Камбоджы Хун Манет і выканаўца абавязкаў прэм'ера Тайланда Пхумтам Вечаячай выказалі гатоўнасць да неадкладнага спынення агню, заявіў прэм'ер Малайзіі Анвар Ібрагім, які выступіў пасярэднікам на перамовах. Пагадненне пачало дзеянне з поўначы 29 ліпеня паводле мясцовага часу.