Расейскія рэгіёны ахапіла новая хваля адключэнняў інтэрнэту

• 29.07.2025, 20:25

На нявызначаны час.

Улады рэгіёнаў Расеі за апошнія дні актывізавалі адключэнні і запаволенне мабільнага інтэрнэту для «стварэння бяспекі». Размова ідзе пра Свярдлоўскую, Цюменскую і Арлоўскую вобласці, Алтайскі і Краснаярскі краі, а таксама Удмуртыю. У некаторых з іх сувязь глушаць ужо з сярэдзіны мінулага тыдня, паведамляе The Moscow Times.

Раніцай 29 ліпеня антытэрарыстычная камісія Свярдлоўскай вобласці паведаміла, што «часовае абмежаванне і запаволенне» мабільнага інтэрнэту ў рэгіёне ўводзіцца «дзеля ўзмацнення бяспекі». Грамадзянам параілі карыстацца правадным інтэрнэтам або падключэннем праз Wi-Fi, а таксама загадзя прадумваць перамяшчэнні па вобласці «з дапамогай афлайн картаў» і выкарыстоўваць «альтэрнатыўныя спосабы аплаты, якія не залежаць ад інтэрнэту».

Для абароны прамысловых і абаронных прадпрыемстваў на фоне налётаў украінскіх дронаў мабільную сетку заглушылі ва Удмуртыі, даклаў днём 28 ліпеня кіраўнік ураду Раман Яфімаў, падкрэсліўшы, што абмежаванні ўводзяцца «на нявызначаны час». «Гэта прэвентыўны захад для блакавання каналаў каардынацыі дэструкцыйных дзеянняў ворага як супраць прадпрыемстваў АПК, так і супраць аб'ектаў сацыяльнай сферы», – заявіў ён, паабяцаўшы пашырыць у рэспубліцы агульнадаступную сетку Wi-Fi і асобна паведаміць пра аднаўленне доступу да інтэрнэту.

Увечары 28 ліпеня арлоўскі губернатар Андрэй Клычкоў напісаў у тэлеграм-канале, што «часовыя абмежаванні» мабільнага інтэрнэту і сувязі з'яўляюцца неабходнасцю праз «практычна штодзённыя» напады беспілотнікаў УСУ на рэгіён. «Чарговы раз прашу паставіцца да такой пастановы з разуменнем. Бяспека Арлоўшчыны і кожнага яе жыхара – безумоўны прыярытэт», – сказаў ён.

Таксама інтэрнэт «у сувязі з прыняццем дадатковых захадаў бяспекі і для прафілактыкі сеткавых пагрозаў» днём у панядзелак адключылі ў Алтайскім краі, які знаходзіцца за 3,5 тыс. км ад Украіны. Абмежаванні (уключаючы запаволенне) «у пэўных лакацыях» прадоўжацца нявызначаную колькасць дзён, паведаміла антытэрарыстычная камісія рэгіёну.

У Цюменскай вобласці інтэрнэту няма яшчэ з 24 ліпеня. Доступ у сетку заблакаваны «ў мэтах бяспекі грамадзянаў», абмежаванні здымуць, «як толькі дазволіць сітуацыя», даклалі ў інфармацыйным цэнтры ўраду рэгіёну. Там дадалі, што ў рэгіёне функцыянуюць 186 пунктаў бясплатнай сеткі Wi-Fi TyumenFree.

У Краснаярскім краі абмежаванні назіраюцца з вечара 26 ліпеня, праблемы ўзніклі ва ўсіх аператараў. Кіраўніца мясцовага Цэнтра кіравання рэгіёнам (ЦУР) Кацярына Кузьміных адрэагавала на скаргі чырванаярцаў, якія працуюць дыстанцыйна і страцілі доступ у сетку, каментаром: «На СВА ўсім працы хопіць». Губернатар рэгіёну Міхаіл Кацюкоў на чацвёрты дзень шатдаўну папрасіў жыхароў паставіцца да сітуацыі з разуменнем і спаслаўся на «аператыўную абстаноўку».

Усяго 28 ліпеня пра інтэрнэт-шатдаўны паведамілі ў 62 рэгіёнах РФ, паведамляе праект «На сувязі». У 44 з іх зафіксаваныя толькі абмежаванні мабільнага інтэрнэту, яшчэ ў 17 скардзіліся на адсутнасць доступу як да мабільнага, так і да праваднога інтэрнэту. У астатніх рэгіёнах перабоі не зафіксаваныя «праз недастатковую інфармацыю адтуль», адзначаюць аналітыкі.