У школах абавяжуць здаваць тэлефоны

• 29.07.2025, 16:43

Плануецца, што школьнікі стануць здаваць смартфоны перад пачаткам урокаў і забіраць у канцы навучальнага дня.

З новага навучальнага года беларускіх школьнікаў чакаюць строгія правілы выкарыстання мабільных тэлефонаў. Падчас заняткаў гаджэты будуць пад забаронай.

Старшыня камітэта адукацыі Менгарвыканкама Марына Ільіна ў эфіры праўладнага тэлеканала СТБ адзначыла, што гаджэты будуць захоўвацца ў спецыяльна адведзеным месцы.

Паводле ейных слоў, сучасныя дзеці занадта пагружаныя ў віртуальны свет, пастаянна выкарыстоўваюць тэлефоны не толькі для пошуку інфармацыі, але і для размоў.

Акрамя таго, Мінадукацыі ўносіць яшчэ некаторыя змены ў працу школ. Так, згодна з пастановай ведамства, з 1 верасня беларускія школьнікі будуць больш займацца фізкультурай.

Дакладней, апублікавалі тыпавыя навучальныя планы, з якіх вынікае, што колькасць урокаў фізічнай культуры для дзяцей 1-11-х класаў на тыдзень стане тры.

Таксама з 2026 года ўсе 10-класнікі (не толькі кадэты і сувораўцы) будуць праходзіць 10-дзённыя вучэбна-палявыя зборы.

Яны пачнуцца адразу пасля заканчэння заняткаў у 10-м класе - з 26 траўня, а працягнуцца да 5 чэрвеня.