Расейская рапірыстка фразай «свет абрынуўся» ацаніла паразу Украіне на ЧС

• 28.07.2025, 19:33

Расейкі саступілі камандзе Украіны з лікам 36:45.

Чэмпіёнка Алімпіяды ў Токіа ў каманднай рапіры Марта Марцьянава заявіла «Матч ТБ», што нервы «зрабілі сваю справу» ў паразе ў 1/8 фіналу чэмпіянату свету з украінкамі.

Марцьянава, Паліна Казаева і Віталіна Анашчанкава ў панядзелак саступілі ў Тбілісі камандзе Украіны з лікам 36:45.

«Сёння ў нас не атрымалася паказаць добрае фехтаванне. Мы разумелі, што будзе цяжка, лёгкіх баёў тут не будзе, але прыняць паразу вельмі цяжка», – сказала Марцьянава.

Паводле ейных словаў, «да паловы ішло нармальна», але потым адбіліся нервы і нястача досведу ўдзелу ў чэмпіянатах свету.

«Мы яшчэ абгаворым прычыны, але цяпер... ведаеце, як быццам свет абрынуўся перад вачыма», – дадала Марцьянава.

Расейкі выступалі ў нейтральным статусе.