Visa прызначыла новага рэгіянальнага кіраўніка ў Беларусі

• 28.07.2025, 11:25

Хто заняў пасаду?

Visa абвясціла аб прызначэнні новага рэгіянальнага кіраўніка ў Беларусі — ім стаў Рычард Грынкевіч, які мае шматгадовы досвед работы ў банкавай сфэры. Пра гэта Myfin.by паведамілі ў прэсавай службе кампаніі.

Прафесійная гісторыя новага кіраўніка ўключае досвед работы ў розных кірунках банкаыага бізнэсу: ад раздробнага абслугоўвання да кіравання прадуктамі.

Грынкевіч будзе апекавацца над рэалізацыяй ключавых ініцыятыў Visa ў краіне, надаючы асаблівую ўвагу развіццю лічбавых аплатных развзязанняў і ўкараненню інавацыйных сэрвісаў.

У зону яго адказнасці ўвойдзе каардынацыя работы з банкамі-партнёрамі, гандлёвымі прадпрыемствамі і канчатковымі карыстальнікамі картак.

У кампаніі адзначылі, што Рычард Грынкевіч спалучае глыбокае разуменне аплатнай індустрыі з практычнымі ўменнямі стварэння эфектыўнага партнёрства, а ягоная экспертыза і лідарскія якасці стануць важным рэсурсам для далейшага развіцця Visa на беларускім рынку.

Крысціна Дораш, старшая віцэ-прэзідэнтка і рэгіянальная кіраўніца Visa ў рэгіёне Усходняй і Паўднёва-Усходняй Еўропы, Цэнтральнай Азіі і Каўказа, адзначыла, што новае прызначэнне адлюстроўвае доўгатэрміновую стратэгію развіцця бізнэсу кампаніі ў Беларусі.

Паводле ейных слоў, увядзенне асобнай кіраўніцкай пазіцыі дазволіць кампаніі больш пільна рэагаваць на змены рынку і больш эфектыўна працаваць з кліентамі.

Сам Грынкевіч назваў сваё прызначэнне вялікім гонарам і выказаў упэўненасць, што супольна з партнёрамі здалее зрэалізаваць важныя праекты лічбавай трансфармацыі аплатнай сфэры.