У Грузіі спалілі сцяг РФ у знак пратэсту супраць допуску "нейтральных" спартсменаў на ЧС у фехтаванні

• 27.07.2025, 21:25

Відэа.

З 22 па 30 ліпеня ў сталіцы Грузіі Тбілісі праходзіць чэмпіянат свету ў фехтаванні. На турнір са скандалам дапусцілі расейцаў і беларусаў у нейтральным статусе.

У нядзелю, 27 ліпеня, каля Алімпійскага палаца спорту ў Тбілісі адбылася акцыя пратэсту супраць допуску прадстаўнікоў РФ да сусветнага першынства. Сабраліся мясцовыя жыхары і ўкраінцы.

Дэманстранты спалілі сцяг Расеі ў знак пратэсту. Відэа апублікавала грузінскае выданне Netgazeti.

Актывісты прынеслі на акцыю плакаты, на якіх былі намаляваныя расейскія фехтавальшчыцы Соф'я Вялікая і Яна Егаран побач з дыктатарам Уладзімірам Пуціным.

Нагадаем, Міжнародная федэрацыя фехтавання (FIE) дапусціла да сусветнага першынства ў нейтральным статусе спартсменаў, якія маюць непасрэдную сувязь з расейскімі ўзброенымі сіламі, у прыватнасці афіцэраў арміі РФ Вялікую і Егаран. Федэрацыя праігнаравала рэкамендацыі Міжнароднага алімпійскага камітэта (МАК) ў допуску нейтральных атлетаў.