У Віцебску рыба пакінула вадаёмы

• 27.07.2025, 20:02

Відэафакт.

Пасля моцных ліўняў у Віцебску можна было не толькі на лодках па вуліцах плаваць, але і ў лужыну вуды закідваць. І мы не жартуем - калі ў вадзе ёсць рыба, значыць, ёсць і шанец яе злавіць. А рыба была.

Партал fishingby.com піша, што пасля моцных ападкаў віцябляне сталі сведкамі выхаду рыбы з вадаёмаў. Прадстаўнікі мясцовай іхтыяфаўны прынялі патоп за разводдзе і сталі пакідаць наседжаныя месцы.

На адной з віцебскіх вуліцаў мінакі назіралі масавыя ўцёкі срэбранага карася з вадаёма, які выйшаў з берагоў.

Каментатары з ліку мясцовых жыхароў, у такое лета не падаюць духам і весяляць адзін аднаго:

“Сёння ў нас надвор'е такое, што не толькі карасі па асфальце скачуць, але і капуста з бульбай марская з'явілася”

“А я то думаю, чаму ўчора не клявала на рэчцы, - карась па асфальце шпацыраваў».

Кагосьці ўбачанае проста развесяліла, а хтосьці нават спрабаваў налавіць рыбы рукамі, пакуль тая была на асфальтавым плыткаводдзі.