У беларускіх каледжах адкрылі новыя спецыяльнасці

• 26.07.2025, 13:44

Выбар вельмі нечаканы.

У 2025 годзе ў менскіх каледжах адкрылі некалькі новых спецыяльнасцяў, пішуць «Минск-Новости».

Падача дакументаў у самым разгары, таму дзелімся гэтымі кірункамі.

Працоўныя прафесіі

Менскі дзяржаўны каледж рамесніцтва і дызайну імя М.А. Кедышкі гатовы навучаць выпускнікоў дзявятых класаў на аператараў аўтаматычных ліній вытворчасці керамічных вырабаў і ліцейнікаў санітарна-будаўнічых вырабаў.

«Абедзве спецыяльнасці запатрабаваныя, перш за ўсё на прадпрыемстве “Керамін”. Менавіта яно стала ініцыятарам іх з'яўлення ў каледжы. На яго базе з 1 верасня адкрыецца навучальная майстэрня, дзе хлопцы асвояць практычныя навыкі», – расказала намесніца дырэктара каледжа Алена Вашкевіч.

У Менскім дзяржаўным механіка-тэхналагічным каледжы праз 20 гадоў адновяць падрыхтоўку спецыялістаў у апрацоўцы рыбы і морапрадуктаў. Паралельна навучэнцы атрымаюць спецыяльнасць «кухар».

«Попыт на кадры высокі»

У Менскім дзяржаўным каледжы сферы абслугоўвання адкрылі набор на спецыяльнасць «бібліятэчная справа». Яна прадугледжвае падрыхтоўку ў дзвюх кваліфікацыях – «бібліятэкар» і «архіварыюс».

Паводле словаў намесніцы дырэктара Святланы Дзядзюлі, попыт на такія кадры ў краіне высокі:

«Бібліятэкары неабходныя ўстановам культуры, адукацыйным і інфармацыйным цэнтрам. Другі кірунак – "архіварыюс" – арыентаваны на падрыхтоўку супрацоўнікаў, якія забяспечваюць захоўванне і сістэматызацыю дакументацыі. Такія супрацоўнікі патрэбныя дзяржаўным арганізацыям, установам аховы здароўя, міністэрствам і ўстановам».

Яшчэ адна новая спецыяльнасць у каледжы – «тэхнічная эксплуатацыя электронных прыладаў».

І апошняя з навінак – кірунак «выхаваўчая праца» ў Менскім гарадскім педагагічным каледжы. Выпускнікі спецыяльнасці асвояць прафесію педагога-арганізатара.