Падаткавікі ўзяліся за прадаўцоў таннага тавару

• 26.07.2025, 10:02

Чарговы выпадак здарыўся ў Крычаве.

Падаткавікі зладзілі праверку кампаніі, якая займаецца раздробным гандлем таварамі нізкай коштавай катэгорыі. Іх завезлі ў нашу краіну з-за мяжы. Пра гэта паведамляе інспекцыя МПЗ Магілёўскай вобласці. У фірмы знайшлі парушэнні, ёй выставілі да даплаты падаткі.

Падаткавікі зладзілі праверку гандлёвай арганізацыі ў Крычаве – «на аснове аналізу і ацэнкі ў сукупнасці ўстаноўленых абставінаў». «Гэта вынікавала заніжэнне падатковай базы ПДК пры ўвозе тавараў і, як вынік, яго няпоўную выплату ў бюджэт», – удакладняе інспекцыя МПЗ Магілёўскай вобласці.

Таксама падаткавікі высветлілі, што прадаўцу плацілі заробак у канверце, а кампанія праводзіла выручку міма каса. А яшчэ правяральнікі вызначылі, што дырэктар здымаў грошы з рахункаў фірмы для свайго распараджэння. «У сувязі з чым ТАА "Г" прызнаецца падатковым агентам і з сумаў выплачаных прыбыткаў абавязанае вылічыць, утрымаць і пералічыць у бюджэт падаходны падатак з фізічных асобаў», – заявілі падаткавікі.

Кампаніі прад'явілі да аплаты ў бюджэт падаткі і пені на 114,1 тысячы рублёў. Хутчэй за ўсё, размова ідзе пра фірму, якая прадае танны тавар з Сярэдняй Азіі.

Нагадаем, цягам многіх гадоў «Беллегпрам» спрабаваў змагацца з папулярнасцю азіяцкіх крамаў з танным адзеннем. Яшчэ ў 2019-м старшыня канцэрна Таццяна Лунгіна выказвала заклапочанасць ростам колькасці такіх крамаў. Яна прапаноўвала больш жорстка рэгуляваць пастаўкі адзення «з рук» у нашу краіну, прызнаючы, што менавіта яны з'яўляюцца канкурэнтамі падпарадкаваных ёй фірмаў:

– Мы не баімся канкурэнцыі ў частцы сэканд-хэнду і азіяцкіх крамаў. Мы просім і будзем змагацца за тое, каб канкурэнцыя была сумленная, празрыстая, адкрытая. Каб тавары, якія прадстаўленыя ў гэтых сетках, адпавядалі патрабаванням і нормам заканадаўства Беларусі.

А ў траўні 2023 года ў Гомельскай вобласці супрацоўнікі Дэпартамента фінансавых расследаванняў пры Дзяржкантролі правялі ператрусы ў кампаніі, якая прадае танныя тавары з Сярэдняй Азіі. Была пачатая крымінальная справа.