У менскім метро з'явілася новая схема ліній

• 24.07.2025, 19:02

Многім не падабаецца дызайн.

Як паведамляе тэлеграм-канал "Метро постсавецкіх краін", новую схему пачалі тэставаць на трэцяй лініі, у цягніку тыпу 81-765.7/766.7 "Менск-2024". Эксперымент праводзяць у цягніку з нумарамі вагонаў 70106-70206-70306-70906. Схема адлюстроўваецца на экранах над дзвярыма, піша Blizko.by.

Дызайн новай схемы падобны да афіцыйнай схемы, што вісіць на станцыях.

Было:

Стала:

Назвы станцый зараз размешчаныя пад вуглом - прыкладна так, як на стэндах над шляхамі.

Пакуль гэта толькі тэставы варыянт, але рэакцыя пасажыраў паказвае, што да фінальнай версіі яшчэ шмат пытанняў.

У каментарах і на транспартных форумах карыстачы актыўна крытыкуюць абноўленую схему. Сярод нараканняў:

"Гэта выглядае, як нешта з пачатку 2000-х у самым дрэнным выкананні";

"Занадта шмат яркага зялёнага колеру, схему пад вуглом цяжка ўспрымаць";

"Папярэдні дызайн быў спакайнейшы і больш прыемны";

"Надпісы адначасова і па-беларуску і па руску, але аднаго памеру - выглядае неакуратна і перагружана";

“Старая схема была дрэнна чытэльная праз дробны шрыфт, але выглядала акуратна. Новая ж цяжка чытаецца, бо перагружаная інфармацыяй і выглядае як зробленая ў MS Paint”.