Амерыканскі выведвальны самалёт праляцеў уздоўж заходніх межаў Расеі

• 23.07.2025, 17:55

NATO рэгулярна праводзіць такія аперацыі.

Амерыканскі самалёт радыёэлектроннай выведкі RC-135v Rivet Joint ВПС ЗША здзейсніў палёт уздоўж паўночнай мяжы NATO і наблізіўся да вайсковых аб'ектаў на паўночным захадзе Расеі. Пра гэта сведчаць звесткі партала FlightRadar24, піша Newsweek (пераклад - сайт Charter97.org).

Самалёт вылецеў з авіябазы Мілдэнхол у Вялікабрытаніі ў аўторак раніцай і правёў у паветры амаль 12 гадзін. Ён прайшоў над Нарвэгіяй, наблізіўся да расейскага рэгіёну Мурманска, затым развярнуўся ў раёне горада Севераморска і вярнуўся ў Вялікабрытанію праз Фінляндыю, краіны Балтыі, Польшчу, Нямеччыну і Нідэрланды.

Мурманская вобласць мяжуе з Фінляндыяй і адыгрывае ключавую ролю ў абароне Расеі. Тут базуецца Паўночны флот, які адказвае за значную частку марскога ядзернага арсенала краіны. У рэгіёне размешчаны буйныя вайсковыя аб'екты, уключаючы галоўную базу падводных лодак у Севераморску, авіябазу Аленья з далёкімі бамбавікамі і мадэрнізаваную авіябазу Севераморск-1.

NATO рэгулярна праводзіць выведвальныя палёты паблізу расейскіх межаў. На мінулым тыдні амаль такім жа маршрутам лётаў брытанскі самалёт RC-135 Каралеўскіх ВПС.