TVN: Кіраўнік МЗС Польшчы пойдзе на падвышэнне

• 22.07.2025, 18:11

Радаславу Сікорскаму прапануюць партфель віцэ-прэм'ер-міністра.

Міністру замежных спраў Польшчы Радаславу Сікорскаму прапануюць партфель віцэ-прэм'ер-міністра падчас рэканструкцыі польскага ўрада.

Пра гэта даведаўся ад крыніц тэлеканал TVN.

Пра намер даць Сікорскаму больш уплывовую пасаду ва ўрадзе заявіў хаўруснікам кааліцыі ў панядзелак прэм'ер-міністр Польшчы Дональд Туск, сцвярджаюць крыніцы TVN.

Суразмоўцы канала кажуць, што кааліцыя падтрымала такі выбар, і ў аўторак Туск мусіць правесці асабістую сустрэчу з Сікорскім, каб абмеркаваць дэталі.

Гэтыя змены, верагодна, адлюстроўваюць рост ролі кіраўніка МЗС Польшчы, які да нядаўняга часу змагаўся за вылучэнне кандыдатам у прэзідэнты ад кіруючай кааліцыі.

Паводле звестак TVN, рэканструкцыя ўрада Польшчы таксама прадугледжвае ўзбуйненне некалькіх міністэрстваў, каб сканцэнтраваць у асобных інстытутах пытанні эканомікі, энэргетыкі і жыллёвай гаспадаркі. Але канчатковай згоды ў гэтых пытаннях на момант публікацыі не было.

Напярэдадні польскія СМІ таксама даведаліся, што сваю пасаду павінен страціць міністр сельскай гаспадаркі Польшчы Чэслаў Сякерскі.

Пра змены ў складзе ўрада Польшчы прэм'ер-міністр Дональд Туск павінен аб'явіць у сераду раніцай.