Спецпрадстаўнік Трампа ў NATO перасцерагае Кітай ад субсідавання расейскай агрэсіі

• 22.07.2025, 17:11

Паводле ягоных слоў, Пекін сур'ёзна пралічыўся.

Прадстаўнік ЗША ў NATO Мэцью Уітакер абвінаваціў Кітай ва ўскоснай падтрымцы расейскай вайны ва Украіне, заявіўшы, што Пекін трэба «паставіць на месца» за «субсідаванне» канфлікту.

Пра гэта ён заявіў у эфіры Fox Business, каментуючы ўзмацненне жорсткасці пазіцыі адміністрацыі прэзідэнта ЗША Дональда Трампа, піша Bloomberg (пераклад - сайт Charter97.org).

«Кітай думае, што вядзе проксі-вайну рукамі Расеі, - заявіў Уітакер. - Яны хочуць, каб ЗША і супольнікі былі занятыя Украінай і не маглі засяродзіцца на іншых стратэгічных выкліках». Паводле ягоных слоў, Кітай «сур'ёзна пралічыўся».

Гэтыя заявы прагучалі праз тыдзень пасля таго, як Дональд Трамп прыгразіў увесці 100-адсоткавыя тарыфы на расейскія тавары, калі Масква не пагодзіцца на мірную дамову цягам 50 дзён. Гэтыя тарыфы, як удакладняюць прадстаўнікі Белага дома, могуць выкарыстоўвацца і да краін, якія купляюць расейскую нафту - у тым ліку да Кітая, Індыі і Бразіліі.

Кітайскія закупкі расейскай нафты выраслі пасля пачатку ўварвання ва Украіну ў 2022 годзе. ЗША і іх супольнікі лічаць такія пастаўкі формай эканамічнай падтрымкі, якая падрывае дзеянне санкцый. Напярэдадні пагрозы Трампа экспарт нафты з Расеі дасягнуў месячнага максімуму.

«Другасныя санкцыі будуць сур'ёзнымі, - падкрэсліў Уітакер. - Яны закрануць усе краіны, якія купляюць расейскую нафту».

Тым часам міністр фінансаў ЗША Скот Бесэнт паведаміў, што на наступным тыдні правядзе перамовы з кітайскімі калегамі ў Стакгольме. Парадак дня ўключае абмеркаванне кітайскіх закупак як расейскай, так і іранскай нафты. Гэтыя размовы могуць ускладніцца заканчэннем гандлёвага замірэння паміж ЗША і КНР, што заканчваецца ў наступным месяцы.