Адразу пяць чыноўнікаў Лукашэнкі злоўленыя на хабарах

• 22.07.2025, 16:24

У аграрнай і лясной галінах бралі хабары за дзяржаўныя кантракты на рамонт тэхнікі.

Супрацоўнікі МУС Беларусі раскрылі карупцыю ў сельскай гаспадарцы, распавядае Telegram-канал ведамства.

Так, праваахоўнікі сачылі за правядзеннем жніва і нарыхтоўчай кампаній, калі выявілі факты атрымання хабараў.

Гаворка ідзе пра некалькіх чыноўнікаў з прадпрыемстваў аграпрамысловага комплексу і лясной гаспадаркі, якія працавалі ў Менскай, Віцебскай і Берасцейскай абласцях.

За што бралі гатоўку?

Як распавялі ў міліцыі, фігуранты крымінальных спраў рэгулярна атрымлівалі грошы ад прадстаўніка камерцыйнай фірмы.

Чыноўнікі лабіявалі яго інтарэсы, складаючы дамовы на рамонт сельгастэхнікі і падпісваючы акты прыёмкі і своечасовую аплату работ.

Сума хабараў дасягала некалькіх тысяч рублёў.

У МУС паабяцалі і далей працаваць з мэтай выяўлення фактаў карупцыі, у тым ліку ў сферы сельскай гаспадаркі.