Галоўная суперніца Азаранкі можа вярнуцца ў тэніс

• 21.07.2025, 18:15

Серэна Уільямс аднавіла трэніроўкі.

Былая першая ракетка свету Серэна Уільямс намякнула на сваё магчымае вяртанне ў тэніс.

Спартсменка апублікавала ў сацыяльных сетках відэа з трэніроўкі на корце.

На кадрах 43-гадовая амерыканка адпрацоўвае ўдары з форхенда і бэкхенда.

Уільямс завяршыла прафесійную кар'еру ў 2022 годзе. Цяпер яна засяродзілася на бізнэсе і выхаванні дзвюх дачок - Алімпіі і Адзіры Рывер.

Адзначым, што малодшая з дачок славутай спартсменкі ўжо спрабуе сябе на корце.

А мама дзеліцца першымі крокамі спадчынніцы ў тэнісе ў сваіх сацсетках.

Цікава, што магчымую ідэю вяртання на корт тэнісістка хавае нават ад родных і блізкіх.

Напрыклад, яе сястра Вінус Уільямс у інтэрв'ю адзначыла, што задумкі сваячкі ёй невядомыя.

"Не ведаю, што яна будзе рабіць. Я не задаю такія пытанні. Думаю, мы проста заўсёды будзем гуляць, таму што заўсёды гэтым займаемся", - сказала сяміразовая пераможца турніраў "Вялікага шлема".