The Telegraph: Захад павінен зрабіць «50-дзённы рывок»

• 21.07.2025, 16:50

Узбраенне Украіны прымусіць Пуціна сесці за стол перамоў.

Міністр абароны Вялікабрытаніі Джон Хілі заклікае супольнікаў да «50-дзённага рыўка» для ўзбраення Украіны, каб прымусіць расейскага лідара Уладзіміра Пуціна сесці за стол перамоў.

Як піша The Telegraph, на сустрэчы кантактнай групы ў абароне Хілі плануе заявіць, што Захаду варта значна павялічыць вайсковую падтрымку Украіны і запэўніць, што Вялікая Брытанія «будзе адыгрываць сваю поўную ролю ў дасягненні поспеху, каб падтрымаць Украіну ў яе барацьбе».

«ЗША пачалі адлік 50-дзённага тэрміну, на працягу якога Пуцін павінен пагадзіцца на мір, інакш яму пагражаюць зруйнавальныя эканамічныя санкцыі. Як чальцы кантактнай групы ў абароне Украіны, мы павінны, у сваю чаргу, распачаць «50-дзённы рывок», каб узброіць Украіну на полі бою і прымусіць Пуціна сесці за стол перамоў», — падае выданне ўрывак з ягонага будучага выступу.

Раней Міністэрства абароны пацвердзіла, што Вялікабрытанія за апошнія два месяцы паставіла Украіне зенітныя ракеты і артылерыйскія набоі на суму 150 мільёнаў фунтаў стэрлінгаў. За апошнія шэсць месяцаў Вялікабрытанія паставіла Украіне 50 000 беспілотнікаў, а яшчэ 20 000 — ад кааліцыі краін на чале з Вялікабрытаніяй і Латвіяй.

Чакаецца, што ў панядзелак на пасяджэнні UDCG будуць прынятыя далейшыя абавязанні: Нямеччына і Вялікабрытанія пагодзяцца закупіць больш ракет супрацьпаветранай абароны, выкарыстоўваючы 170 мільёнаў еўраў з Бэрліна.