Менчукоў двойчы заліло праз дрэнную ліўнёўку

• 17.07.2025, 10:20

Кватэра размешчаная на апошнім паверсе дома.

Жыллё сямейнай пары з Менска двойчы затапіла, прычым не з-за суседзяў. Яны паскардзіліся ўладам.

Менчукі пражываюць у доме на вуліцы Семяняка ў Фрунзенскім раёне. За апошні год іх кватэру залівала двойчы, прычым апошні раз зусім нядаўна – 5 ліпеня.

І справа не ў суседзях: муж і жонка жывуць на апошнім паверсе. Вінаватая няўдала зробленая сістэма ліўневай каналізацыі, якая адводзіць дажджавую ваду з даху дома.

«На тэхнічным паверсе ўсталяваная пластыкавая заглушка, якая мацуецца на разьбе. Але моцнага напору вады яна не вытрымлівае і зрываецца. У выніку вада трапляе на тэхнічны паверх, а адтуль – наўпрост у нашу кватэру», – патлумачыў муж.

У выніку беларусы не могуць нават пачаць рамонт, таму што баяцца наступнага патопу.

Улады былі ў курсе праблемы і сапраўды фіксавалі заглушку, якая адыходзіць. Аднак цалкам развязаць пытанне не атрымліваецца.