У Літве патлумачылі, чаму не збілі «Гербер», які заляцеў з Беларусі

• 11.07.2025, 20:31

Санкцыю на ўдар дае асабіста міністр абароны.

Літоўскія сілы супрацьпаветранай абароны не збілі расейскі дрон “Гербера”, бо ў мірны час паветраныя аб'екты збіваюцца толькі ў выключных выпадках. Санкцыю на ўдар дае асабіста міністр абароны.

Пра гэта паведамляецца ў афіцыйнай заяве войска Літвы, якое апублікавала выданне LRT.

"У мірны час знішчэнне паветраных аб'ектаў ажыццяўляецца толькі ў зусім выключных выпадках. Цывілізаваныя краіны не збіваюць аб'екты, якія не нясуць пагрозы, нават калі яны парушылі дзяржаўную мяжу”, - сказана ў заяве вайскоўцаў.

У мірны час паветранай прасторай кіруюць грамадзянскія структуры. Кантроль і назіранне за паветрам над краінай ажыццяўляе кіраванне назірання і кантролю паветранай прасторы Вайсковых паветраных сіл Літвы.

Збіць паветраныя цэлі вайскоўцы могуць толькі ў выпадку, калі аб'екты ў паветры пагражаюць нацыянальнай бяспецы, або крытычнай інфраструктуры. Прыняць пастанову могуць некалькі чалавек:

міністр абароны Літвы, або асоба, якой ён дэлегаваў паўнамоцтвы - калі задзейнічана войска;

камандаванне паветраных сіл NАТО (AIRCOM) - калі для гэтага выкарыстоўваюць знішчальнікі місіі паветранай паліцыі.

Толькі пасля прыняцця пастаноў ажыццяўляецца збіванне. У войску Літвы запэўніваюць, што дрон не пагражаў жыццю людзей, або крытычна важным аб'ектам, у адваротным выпадку яго б збілі.

Нагадаем, што 10 ліпеня ў Літве паднялі знішчальнікі праз невядомы дрон з Беларусі. З-за пагрозы кіраўніцтва краіны перайшло да схованак. Невядомы беспілотнік упаў за кіламетр ад беларускай мяжы, каля закрытага пункта пропуску Шумск.

Пазней міністарка нацыянальнай абароны Літвы Давіле Шакалене пацвердзіла, што гэта быў расейскі беспілотнік «Гербера» - дрон-прынада без баявой часткі, прызначаны для пераключэння СПА. Як ён змог даляцець да тэрыторыі Літвы праз Украіну і Беларусь, пакуль не вядома.