Украіна і яшчэ 11 дзяржаў далучыліся да патрабавання ЕЗ вызваліць беларускіх палітвязняў

• 11.07.2025, 20:21

Ад Лукашэнкі запатрабавалі зрабіць гэта неадкладна і безумоўна.

Да неадкладнага і безумоўнага вызвалення ў Беларусі палітычных зняволеных, іх рэабілітацыі і спынення рэпрэсій заклікала дэлегацыя Еўразвязу ў Радзе Еўропы 9 ліпеня на пасяджэнні кіроўнага органа арганізацыі Камітэта міністраў у Страсбургу (Францыя), паведамляе «Радыё Рацыя».

Да заявы, распаўсюджанай ад імя ўсіх дзяржаў Еўразвязу, далучыліся 12 краін: Албанія, Андора, Вялікабрытанія, Ісландыя, Ліхтэнштэйн, Малдова, Манака, Нарвэгія, Сан-Марына, Паўночная Македонія, Украіна і Чарнагорыя.

У заяве вітаецца вызваленне Сяргея Ціханоўскага і яшчэ 13 палітвязняў дзякуючы ўдзелу ЗША. У дакуменце падкрэсліваецца, што Еўразвяз «па-ранейшаму глыбока ўстурбаваны сітуацыяй з правамі чалавека ў Беларусі і рашуча асуджае працяглыя кампаніі пераследу і запалохвання ўсіх слаёў беларускага грамадства, уключаючы праваабаронцаў, журналістаў, незалежных прафзвязных актывістаў, прадстаўнікоў грамадзянскай супольнасці і асоб, якія належаць да нацыянальных меншасцяў».