Польскія F-16 будуць патруляваць паветраную прастору над краінамі Балтыі

• 13.03.2025, 20:17

З 1 красавіка.

З 1 красавіка Польшча будзе патруляваць паветраную прастору краінаў Балтыі. Пра гэта 13 сакавіка заявіў кіраўнік польскага Міністэрства абароны Уладзіслаў Касіняк-Каміш, якога цытуе ўстанова.

Паводле ягоных словаў, для гэтага Польшча задзейнічае чатыры самалёты F-16 і 150 сваіх вайскоўцаў, якіх накіруюць у Літву.

«Гэта наш уклад у салідарнасць і хаўрусніцкую абарону неба над краінамі Балтыі», – сказаў міністр.

Місія патрулявання прадоўжыцца да 31 ліпеня.

Таксама ён расказаў пра супольную з краінамі Еўрапейскага Звязу ахову Балтыйскага мора.

«На нашу просьбу стварылі “Балтыйскую варту” – аперацыю NATO, у якой мы ўдзельнічаем разам. Мы размяшчаем нашы падраздзяленні, абараняем нашы тэрытарыяльныя воды і дзейнічаем у раёне Балтыйскага мора», – растлумачыў чыноўнік.

Акрамя таго, Касіняк-Камыш заклікаў польскіх вытворцаў зброі павялічыць свае вытворчасці.