«Качанавай не даюць спакойна спаць «дармаеды»

• 6.02.2025, 14:41

Беларуска – пра шалёныя законы, прынятыя рэжымам.

Чытачка сайта Charter97.org распавяла, з чым ёй даводзіцца сутыкацца праз мужа, якога ўлады запісалі ў «дармаеды»:

— Не даюць Качанавай спакойна спаць «дармаеды»! Спачатку гэтых «дармаедаў» самі прыдумалі, а зараз з іх «здымаюць шкуру».

Мы гадуем траіх дзяцей. Мой муж Антон мае сярэднюю спецыяльную адукацыю. Як яму зарабіць грошы на іх утрыманне? Каб неяк жыць, а не перабірацца з груцы на аўсянку.

Доўга працаваў Антон на розных прадпрыемствах раёна за мізэрную плату, пакуль не надакучыла. Падумалі мы і адправілі нашага тату працаваць кіроўцам фургона ў Еўропу.

І тут на нас пасыпалася: падвышаная аплата за камунальныя паслугі, немагчымасць скарыстацца бацькоўскім капіталам, ну і зараз павісла пытанне аб абмежаванні доступу да бясплатнай медыцыны.

Ну, не скажу, што мы вельмі маем да яе доступ. Так, калі прастуда, то пайсці да тэрапеўта - няма праблем: адсядзі чаргу і карыстайся. А вось калі здараюцца нейкія больш сур'ёзныя праблемы, то даставай партманэт і плаці, а то можна і год чакаць чаргі, напрыклад, да эндакрынолага, або калі трэба зрабіць ультрагукавое даследаванне.

Тое самае і ў паліклініцы для дарослых. Мне здаецца, што туды я хаджу толькі па даведкі для месца працы. Усё астатняе даводзіцца лячыць за грошы. І добра, што мы іх маем.

Дык і муж мой, дзякуючы таму, што працуе за мяжой, калі прыязджае, то ў пытаннях здароўя звяртаецца ў прыватныя цэнтры.

Хаця гэтая сітуацыя мяне вельмі напружвае. Навошта лукашысты дзеляць нашае грамадства на касты? Так, мой муж не плаціць падаткі ў сваёй дзяржаве. Але ж мы аплачваем падаткі, закладзеныя ў цану тавараў і паслуг.

Дзякуючы таму, што муж добра зарабляе, маем большыя пакупніцкія здольнасці, чым нашыя суседзі. Аднак хто ж прымусіў майго мужа адправіцца на чужыну, як не самі лукашысты?