Беларусы масава байкатуюць «пенсійную піраміду» ад Лукашэнкі

• 6.02.2025, 12:50

Дыктатару паверыў толькі 1 адсотак.

Усяго толькі блізу 45 тысяч беларусаў падпісалі дамовы дадатковага пенсійнага страхавання па дзяржаўнай праграме «3+3». Пра гэта ў сваім тэлеграм-канале распавяла «дэпутатка» «парламента» Ірына Касцевіч, піша «Зеркало».

З 1 кастрычніка 2022 года работнікі пры жаданні могуць выплачваць страхавы ўнёсак на дадатковую назапашвальную пенсію - да 10% ад свайго заробку. Наймальнікі абавязаныя ў такім выпадку пералічваць на гэты конт яшчэ да 3%. Прычым ёсць нюанс: працадаўца павінен пералічваць такі ж адсотак, як і работнік, але не больш за 3%. Напрыклад, калі спецыяліст кампаніі захоча ўносіць на дадатковую пенсію 2% ад свайго заробку, то столькі ж павінен дадаць і наймальнік. А калі работнік выбера тарыф 5%, то наймальнік «накіне» максімальныя 3%.

Гэтыя дадатковыя пенсійныя ўнёскі можна аформіць праз страхавую кампанію «Стравіта».

На дадатковую пенсію па прапанаванай дзяржавай схеме «3+3» збіраюць 45 тысяч чалавек, паведаміла Ірына Касцевіч. Але яна не ўдакладніла, на якую дату гэтыя звесткі. 70% тых, хто падпісаў такую дамову, — гэта жанчыны.

Пры гэтым у лістападзе мінулага года Мінфінансаў паведамляла, што тады было падпісала больш за 40,7 тысячы такіх пагадненняў.

Паводле звестак Белстата, у снежні мінулага года ў эканоміцы было занята 4 млн 129,7 тысячы чалавек. Гэта азначае, што да гэтай дзяржпраграмы далучылася амаль 1,1% працоўных беларусаў.

Ірына Касцевіч удакладніла, што ў лістападзе - снежні гэтага года пачнуць выплачваць першыя страхавыя пенсіі. Іх будуць атрымліваць 47 чалавек, якія першымі падпісалі дамовы і да таго моманту будуць збіраць паводле такой схемы тры гады.