У Берліне выйшлі на забастоўку работнікі грамадскага транспарту

• 10.02.2025, 18:46

Другі раз з пачатку года.

У нямецкай сталіцы ў Берліне ў панядзелак, 10 лютага, пачалася забастоўка работнікаў грамадскага транспарту, у выніку чаго другі раз з пачатку года спыніўся рух аўтобусаў, трамваяў і метрапалітэна нямецкай сталіцы.

Як паведамляе dpa, зараз прафзвяз Verdi вядзе калектыўныя перамовы з Берлінскай транспартнай службай (BVG).

Галоўны перамоўнік Джэрэмі Арнт распавёў у каментары выданню, што забастоўка пачалася, як і планавалася, раніцай у панядзелак.

Страйк закрануў цягнікі метрапалітэна, аўтобусныя злучэнні і трамваі, у той жа час прыгарадныя цягнікі S-Bahn і рэгіянальныя злучэнні курсуюць у звычайным рэжыме.

Забастоўка супала з першым днём пасля зімовых школьных вакацый у сталіцы Нямеччыны.

Нагадаем, 27 студзеня ў Берліне праходзіла папераджальная забастоўка работнікаў грамадскага транспарту.