Зяленскі жорстка выказаўся аб тэрытарыяльных кампрамісах у «мірным плане» ЗША

• 8.12.2025, 21:40

Украіна цвёрда прытрымліваецца сваёй пазіцыі.

Прэзідэнт Украіны Уладзімір Зяленскі катэгарычна абверг магчымасць перадачы ўкраінскіх тэрыторый у межах мірнай ініцыятывы Злучаных Штатаў Амерыкі.

Пра гэта Зяленскі заявіў падчас зносін з журналістамі.

- Ці разглядаем мы пытанне аддаць нейкія тэрыторыі? Мы не маем паводле закону ніякага права - паводле закону Украіны, паводле нашай Канстытуцыі, паводле міжнароднага права, калі шчыра. І маральнага права таксама не маем, - падкрэсліў ён.

Зяленскі адзначыў, што Расія працягвае настойваць на перадачы акупаваных тэрыторый, але Украіна не пойдзе ні на якія ўступкі.

- Безумоўна, Расія настойвае, каб мы аддалі тэрыторыі. Мы адназначна не хочам нічога аддаваць - за гэта мы і змагаемся. Вы гэта выдатна ведаеце, - дадаў прэзідэнт.

У той жа час ён падкрэсліў, што Злучаныя Штаты «сёння шукаюць кампраміс», аднак Украіна цвёрда прытрымліваецца сваёй пазіцыі адносна тэрытарыяльнай цэласнасці.