Зяленскі: Калі Расія зноў пачне вайну, што будуць рабіць партнёры Украіны?

• 8.12.2025, 16:36

У чым галоўная праблема перамоваў?

Падчас перамоваў па мірнай ініцыятыве, прапанаванай ЗША, бакі так і не дасягнулі згоды адносна будучыні Данецкай і Луганскай абласцей, паведаміў прэзідэнт Украіны Уладзімір Зяленскі у інтэрв’ю Bloomberg .

«Ёсць бачанне ЗША, Расіі і Украіны, і ў нас няма адзінага меркавання па Данбасе», — цытуе Зяленскага выданне.

Паводле слоў прэзідэнта Украіны, Кіеў настойвае на асобным пагадненні аб гарантыях бяспекі ад заходніх саюзнікаў, перш за ўсё ад ЗША, перадае УНІАН.

«Ёсць адно пытанне, на якое я — і ўсе ўкраінцы — хачу атрымаць адказ: калі Расія зноў пачне вайну, што будуць рабіць нашы партнёры», — сказаў Зяленскі.

Уладзімір Зяленскі ў панядзелак, 8 снежня, сустракаецца ў Лондане з еўрапейскімі лідарамі, якія падтрымаюць Украіну на фоне ўзмацнення ціску з боку ЗША. Акрамя прэм’ер-міністра Вялікабрытаніі Кіра Стармера, у саміце прымуць удзел прэзідэнт Францыі Эмануэль Макрон і федэральны канцлер Германіі Фрыдрых Мерц.