Камандаванне войскаў РФ хавае рэальныя страты

• 8.12.2025, 14:42

Загінулых акупантаў афармляюць як дэзерціраў.

Пасля маштабных страт камандаванне расійскай арміі наўмысна афармляе загінулых як «тых, хто самавольна пакінуў вайсковую частку». Пра гэта 8 снежня паведамляе партызанскі рух «Атэш» са спасылкай на сваіх агентаў у 30-й ОМБР Узброеных Сіл краіны-агрэсара РФ.

Так яны хаваюць рэальную колькасць загінулых і пазбягаюць прэтэнзій з боку сваякоў, гаворыцца ў паведамленні.

У брыгадзе ўжо стварылі асобныя спісы, куды ўносяць сотні прозвішчаў, падаючы загінулых як збеглых. Асабоваму складу адкрыта кажуць, што «СОЧ — гэта прасцей, чым тлумачыць сваякам, дзе цела». Такую схему выкарыстоўваюць таксама ў дачыненні да тых, хто знік без вестак у выніку штурмаў горада, і да тых, каго ліквідавалі заградатрады.

За апошні год маштабы фіктыўных СОЧ выраслі ў разы. Паводле крыніц, з іх «ужо можна сабраць цэлую брыгаду».

«Такая практыка цалкам разбурае рэшткі даверу паміж байцамі. Салдаты разумеюць, што ў любую хвіліну іх могуць «спісаць» як збеглых, нават калі яны загінулі ў баі. Гэта выклікае страх, агрэсію і імклівае падзенне маральнага стану. Дысцыпліна заняпала, камандаванню не вераць, а баяздольнасць падраздзялення дэградуе з кожным новым штурмам», — адзначаюць у «Атэш».