150 тысяч расіян не могуць узяць Пакроўск

• Дзмітрый Снягіроў
• 8.12.2025, 12:45

Вайсковая эліта РФ выбіваецца ў баях за горад.

У бой пад Пакроўскам кінутыя элітныя вайсковыя падраздзяленні — настолькі важным для Пуціна з'яўляецца ўзяцце гэтага горада. Але вайсковы аналітык Дзмітрый Снягіроў сцвярджае, што з-за катастрафічных страт «элітай» гэта можна называць ужо толькі ўмоўна — па сутнасці, замест марскіх пяхотынцаў і паветрана-дэсантнікаў ваююць штрафнікі.

Вораг перакідвае ўсе найбольш баяздольныя часткі на Пакроўскі напрамак.

Паводле інфармацыі аналітычнага аддзела ГІ «Правое Дело», з Запарожскага напрамку на Пакроўскі перакінутыя найбольш баяздольныя падраздзяленні расійскай акупацыйнай арміі. У прыватнасці, гэта 76-я паветрана-дэсантная дывізія. Аднак перадыслакацыя падраздзяленняў марской пяхоты выглядае, відавочна, як ротацыя асабовага складу.

На дадзены момант менавіта падраздзяленні марской пяхоты Узброеных Сіл краіны-акупанта панеслі найбольш сур'ёзныя страты асабовага складу. Напрыклад, 810-я брыгада марской пяхоты расійскіх акупантаў змяніла ўжо чатыры поўныя склады. То бок страты катастрафічныя. Некамплект, гібель, а таксама фармаванне новых батальённа-тактычных груп з непадрыхтаванага персаналу (нават з экіпажаў караблёў) знізілі баяздольнасць брыгады.

Называць гэта падраздзяленнямі «марской пяхоты» можна даволі ўмоўна, бо цяпер яны камплектуюцца з ліку былых расійскіх зняволеных. Гэта значыць, тых асоб, якія, згодна з указам расійскага дыктатара, маюць права падпісаць дамову з Міністэрствам абароны РФ непасрэдна ў зале суда. Таму расіянам варта забыцца пра такое рэальнае злучэнне, як марская пяхота.

Сучасныя расійскія «марпехі» — гэта аналаг «штрафных» падраздзяленняў акупацыйнай арміі, такіх як «Шторм Z» або «Шторм V».

Адначасова адзначу, што сам факт перадыслакацыі падраздзяленняў 76-й паветрана-дэсантнай дывізіі сведчыць пра тое, што аператыўных рэзерваў у расійскіх акупантаў практычна няма. Гэта вельмі паказальна. Пры гэтым, нягледзячы на шматкротную перавагу ў жывой сіле на тым жа Запарожскім або Пакроўскім напрамках, у якасці аператыўных рэзерваў і штурмавых падраздзяленняў выкарыстоўваюцца найбольш баяздольныя часткі расійскай акупацыйнай арміі — тыя ж падраздзяленні марской пяхоты. Хоць штурмавыя дзеянні ва ўмовах гарадской забудовы не ўваходзяць у функцыянал марской пяхоты.

Аналагічная сітуацыя — і з падраздзяленнямі паветрана-дэсантных войскаў, якія фактычна кідаюць у «мясныя штурмы». Таму казаць пра наяўнасць баяздольных падраздзяленняў у акупантаў на дадзены момант не даводзіцца. Асабліва з улікам колькасці страт асабовага складу акупацыйных войскаў. Напрыклад, на Пакроўскім напрамку штодзённыя страты ворага, паводле даных украінскага боку, каля 500 чалавек. Яшчэ каля 300 чалавек яны губляюць на Запарожскім напрамку.

Калі казаць канкрэтна пра Пакроўск, варта абвергнуць інфармацыю некаторых замежных аналітыкаў пра нібыта ўзяцце горада пад поўны кантроль акупантамі.

Сілы абароны Украіны ўтрымліваюць пазіцыі ў Пакроўску. Паведамленні некаторых заходніх аналітыкаў пра тое, што акупацыйныя войскі ўзялі горад пад поўны кантроль, не адпавядаюць рэчаіснасці. Больш за тое, варта адзначыць, што Сілы абароны Украіны паспяхова знішчаюць асабовы склад ворага менавіта з ліку так званых штурмавых груп. Пры гэтым вораг нясе цяжкія страты.

Паводле інфармацыі Сіл спецыяльных аперацый, нягледзячы на масіраваныя абстрэлы індустрыяльных аб'ектаў і спробы ворага там замацавацца, аператарам ССО ўдалося паспяхова правесці спецыяльныя дзеянні і знішчыць акупантаў, якія вырушылі да запланаванай кропкі.

Акрамя таго, на Пакроўскім напрамку тактычная група 3-га палка ССО правяла прамыя дзеянні на прамысловым аб'екце. Падчас паветранай разведкі аператары выявілі ворага, які інфільтраваўся на тэрыторыю шахты. Дачакаўшыся спрыяльных умоў надвор'я, група адправілася на выкананне задання. Далей усё адбывалася па дакладным сцэнары: кантакт — адпрацаваныя дзеянні ў фармаце CQB (Close Quarters Battle — бліжні бой у абмежаванай прасторы) і знішчэнне. Праца адбывалася пры падтрымцы разлікаў БПЛА з «вачамі ў небе» і FPV.

Ацэньваючы важнасць Пакроўскага напрамку і горада Пакроўск у прыватнасці, варта адзначыць, што для расійскага дыктатара гэта цяпер больш палітычнае пытанне.

Пакроўскі напрамак цяпер характарызуецца найвышэйшай інтэнсіўнасцю. Пры гэтым расійскія акупацыйныя войскі выконваюць не столькі вайсковую функцыю, спрабуючы прасунуцца наперад, колькі палітычную. Расійскаму дыктатару надзвычай неабходна на момант актывізацыі перамоўнага працэсу прадэманстраваць тактычныя поспехі. Для гэтага трэба ўзяць такія буйныя гарады, напрыклад, як Пакроўск або Мірнаград. Але, як бачым, сітуацыя далёкая ад бравурных заяў расійскага дыктатара пра тое, што Пакроўск цалкам знаходзіцца пад кантролем акупацыйных войскаў.

Пуцінскія заявы пра кантроль над Пакроўскам — не больш як спроба ўразіць унутрырасійскую аўдыторыю і амерыканскага прэзідэнта Дональда Трампа.

Заявы пра «ўзяцце» Пакроўска, «акружэнне» украінскіх войскаў — гэта не больш як інфармацыйныя аперацыі для фармавання патрэбнай Крэмлю грамадскай думкі. Прычым гэта ўсё працуе або выключна на расійскую аўдыторыю, або на амерыканскага прэзідэнта. Аднак апошні выдатна дасведчаны пра рэальны характар падзей на Пакроўскім напрамку.

Як аргумент на карысць гэтай высновы прывяду статыстыку інтэнсіўнасці баевых сутыкненняў у раёне Пакроўска.

Невыпадкова за апошні тыдзень назіраецца рэзкая актывізацыя баевых сутыкненняў: са 150 баевых сутыкненняў за суткі колькасць павялічылася да 270. Пры гэтым толькі цягам апошніх сутак зафіксавана зніжэнне колькасці баевых сутыкненняў па ўсёй працягласці расійска-ўкраінскага фронту.

У сваю чаргу, украінскія абаронцы, нягледзячы на неспрыяльныя ўмовы надвор'я, якія не дазваляюць у поўнай меры выкарыстоўваць тактыку «сцяны дронаў» на Пакроўскім напрамку, вырашылі праблему з лагістыкай за кошт прыцягнення спецпадраздзяленняў Галоўнага ўпраўлення разведкі Міністэрства абароны Украіны і Сіл спецыяльных аперацый. Цяпер яны фактычна вырашаюць задачы па пашырэнні лагістычнай складовай украінскай арміі і ўтрыманні агнявых пунктаў украінскай абароны.

Тое, што вялізная групоўка акупацыйных войскаў колькасцю ў 150 тыс. чалавек дагэтуль не можа ўзяць Пакроўск, на маю думку, сведчыць пра тое, што ў поўнай меры баяздольных падраздзяленняў у ёй амаль не засталося.

Яшчэ даволі паказальны факт адносна Пакроўскага напрамку: з 150 тысяч акупантаў, сканцэнтраваных там, няма рэальна баяздольных падраздзяленняў, якія маглі б выконваць функцыі штурмавікоў. А гэта — сведчанне нізкага баявога ўзроўню і маральна-псіхалагічнага клімату акупацыйнай арміі.

Нагадую, 2 снежня расійскі дыктатар нібыта наведаў адзін з пунктаў кіравання аб'яднанай групоўкі расійскіх войскаў, дзе яму далажылі пра нібыта захоп Пакроўска Данецкай вобласці і Ваўчанска Харкаўскай вобласці.

У сваю чаргу Генеральны штаб Узброеных Сіл Украіны заявіў, што «бравурныя заявы кіраўніцтва краіны-агрэсара пра «захоп» гэтых населеных пунктаў арміяй РФ не адпавядаюць рэчаіснасці».

Дзмітрый Снягіроў, «Фокус»