Польшча абвясціла ў вышук Інтэрпола двух украінцаў-дыверсантаў РФ

• 7.12.2025, 18:42

Яны збеглі ў Беларусь.

Польшча накіравала запыты на «чырвоныя» ордэры на арышт Інтэрпола ў дачыненні да грамадзян Украіны Яўгена Іванова і Аляксандра Кононава, якіх следства лічыць выканаўцамі дыверсій на польскай чыгунцы па замове РФ, паведамляе RMF24.

Польскія органы накіравалі ў Інтэрпол зварот аб выдачы «чырвоных» ордэраў у дачыненні да грамадзян Украіны Яўгена Іванова і Аляксандра Кононава, што ў выпадку задавальнення звароту дазволіць абвясціць іх у міжнародны вышук.

Перад гэтым у Польшчы прынялі завочнае рашэнне аб арышце абодвух падазраваных і выдалі еўрапейскі ордэр на арышт аднаго з украінцаў.

Нагадаем, размова ідзе пра падрыў чыгункі каля вёскі Міка і падкладванне прадметаў на чыгуначную інфраструктуру каля станцыі Пулаўы 15–16 лістапада.

Паводле высноў следства, гэта дыверсія ў інтарэсах Расіі. Падазраваныя ўехалі ў Польшчу па фальшывых дакументах і знаходзіліся ў краіне ўсяго некалькі гадзін, пасля чаго выехалі ў Беларусь.