СМІ: Жанчыну пакінулі замярзаць на найвышэйшай гары Аўстрыі

• 7.12.2025, 11:06

Гісторыя альпіністкі і яе сябра раптам апынулася ў цэнтры ўвагі.

У студзені 2025 года на найвышэйшай гары Аўстрыі — Гросглоккнеры (3798 метраў) — адбылася трагедыя. 33-гадовая альпіністка Керстын Гуртнер загінула ад пераахалоджання ўсяго за 50 метраў ад вяршыні пры тэмпературы мінус 20 градусаў па Цэльсіі. Цяпер гэта гісторыя апынулася ў цэнтры ўвагі. Вінаватым у смерці лічаць яе бойфрэнда, піша Daily Mail.

Керстын падымалася на гару разам са сваім 39-гадовым бойфрэндам Томасам Пламбергерам, які быў вопытным альпіністам. Аднак пракуратура лічыць, што ён дапусціў шэраг крытычных памылак, якія прывялі да смерці яго дзяўчыны.

Згодна з абвінавачваннем, пара была дрэнна падрыхтаваная да ўзыходжання — Керстын была ў непадыходным абутку (мяккіх сноўбордных ботах), яны пачалі ўздым з двухгадзінным спазненнем і не ўзялі неабходны аварыйны рыштунак. Керстын была недастаткова вопытная ў такіх складаных горных паходах.

Каля другой гадзіны ночы, калі дзяўчына была знясіленая, пераахалоджаная і дэзаарыентаваная, Томас пакінуў яе адну і пачаў спускацца. Ён не прыкрыў яе ад ветру, не выкарыстаў ратавальную коўдру або бівуачны мяшок. Калі над імі пралятаў паліцэйскі верталёт, ён не падаў сігналаў бедства. Томас перавёў тэлефон у бясшумны рэжым і прапусціў званкі выратавальнікаў. Толькі ў 3:30 ночы, ужо пакінуўшы партнёрку, ён выклікаў дапамогу.

З-за ўраганнага ветру выратавальнікі змаглі дабрацца да Керстын толькі раніцай, але было ўжо позна — жанчына загінула.

Томас праз адваката адмаўляе абвінавачанні, сцвярджаючы, што спускаўся па дапамогу і што гэта быў няшчасны выпадак. Аднак пракуратура прад'явіла яму абвінавачанне ў неўмысным забойстве па грубай неасцярожнасці. Суд пачнецца ў лютым 2025 года, і мужчыне пагражае да трох гадоў турмы.