Вялікі банк адкрыў іпатэчны цэнтр у Мінску

• 7.12.2025, 9:55

Што прапануюць кліентам.

Белаграпрамбанк запусціў у Мінску свой першы іпатэчны цэнтр. Тут кліенты могуць прайсці увесь шлях афармлення крэдыту на жыллё ў адным месцы. Нагадаем, падобны іпатэчны цэнтр таксама ёсць у «Беларусбанку».

Іпатэчны цэнтр аб’ядноўвае ключавыя паслугі: кансультацыі спецыялістаў, падбор крэдытаў, дапамогу ў падрыхтоўцы дакументаў і суправаджэнне здзелкі. То бок кліентам не трэба звяртацца ў розныя падраздзяленні банка, цяпер усё можна зрабіць у адным месцы.

Выканаўчы дырэктар банка Валянціна Юркова патлумачыла, што Мінск стаў пілотнай пляцоўкай: «Мы хочам падтрымаць кліентаў, якія вырашаюць важнае жыллёвае пытанне. Вынікі працы цэнтра будуць уважліва вывучаныя, і затым мы зможам укараняць найбольш эфектыўныя практыкі ў іншых гарадах».

Нагадаем, у «Беларусбанку» таксама ёсць іпатэчны цэнтр у Мінску. Напрыклад, у маі 2023 года ў ім утварыліся доўгія чэргі ахвотных падаць дакументы на афармленне крэдыту на нерухомасць.