Reuters: Прыхільнікі Асада з Расіі плануюць паўстанне ў Сірыі
- 7.12.2025, 8:37
Пералічваюць мільёны долараў патэнцыйным байцам.
Прыхільнікі былога прэзідэнта Сірыі Башара Асада, якія збеглі ў Расію пасля ягонага падзення, пералічваюць мільёны долараў патэнцыйным байцам, спадзеючыся распаліць паўстанне супраць новага ўрада і вярнуць страчаны ўплыў.
Пра гэта паведамляе Reuters.
Як піша агенцтва, Башар Асад, які збег у Расію год таму, у асноўным змірыліўся з выгнаннем у Маскве. Але іншыя высокапастаўленыя чыноўнікі з яго блізкага атачэння, уключаючы ягонага брата, не змірыліся са стратай улады.
Як высветлілі журналісты Reuters, двое калісьці найбліжэйшых да Асада людзей — генерал-маёр Камаль Хасан і мільярдэр Рамі Махлуф — спаборнічаюць у фармаванні апалчэння на ўзбярэжжы Сірыі і ў Ліване. Паводле іх задумы, яно павінна складацца з членаў алавіцкай секты, якая даўно звязаная з сям'ёй Асадаў.
На каго разлічваюць прыхільнікі Асада
У цэлым гэтыя двое мужчын і іншыя групоўкі, што змагаюцца за ўладу, фінансуюць больш за 50 тысяч байцоў у надзеі заваяваць іх лаяльнасць.
Адным з пераваг для Хасана і Махлуфа з'яўляецца кантроль над сеткай з 14 падземных камандных пакояў, пабудаваных уздоўж узбярэжжа Сірыі напрыканцы кіравання Асада, а таксама сховамі са зброяй. Двое афіцэраў і сірыйскі рэгіянальны губернатар пацвердзілі існаванне гэтых схаваных пакояў.
Хасан, які быў начальнікам ваеннай разведкі Асада, пастаянна тэлефануе і дасылае галасавыя паведамленні камандзірам і дарадцам.
Махлуф, стрыечны брат Асада, калісьці выкарыстаў сваю бізнес-імперыю для фінансавання дыктатара падчас грамадзянскай вайны, але потым пасварыўся з больш уплывовымі сваякамі і шмат гадоў правёў пад хатнім арыштам. Цяпер у размовах і паведамленнях ён прадстаўляе сябе як месіянскую постаць, якая вернецца да ўлады пасля пачатку «апакаліптычнай фінальнай бітвы».
Хто можа супрацьстаяць мяцежнікам
Праўда, адзначае Reuters, здаецца, што выгнанцы пакуль не мабілізавалі ніякіх сіл. Акрамя таго, многія алавіты ў Сірыі не давяраюць былым паплечнікам Асада.
Каб супрацьстаяць змоўнікам, новы ўрад Сірыі прыцягвае яшчэ аднаго былога прыхільніка Асада — сябра дзяцінства новага прэзідэнта Ахмеда аш-Шараа Халеда аль-Ахмада. Ён быў лідарам ваенізаваных фармаванняў Асада, але пасля таго, як дыктатар адвярнуўся ад яго, перайшоў на бок новай улады. Яго задача — пераканаць былых салдат і грамадзянскіх асоб-алавітаў, што іх будучыня — з новай Сірыяй.
Падрабязнасці расследавання грунтуюцца на інтэрв'ю з 48 людзьмі, якія непасрэдна знаёмыя з планамі патэнцыйных паўстанцаў. Усе яны гаварылі на ўмовах ананімнасці.
Камаль Хасан і Рамі Махлуф не адказалі на запыты. З Башарам і Махерам Асадамі звязацца не ўдалося, адзначае Reuters.
У чым абвінавачваюць Башара Асада
У верасні 2025 года Міністэрства юстыцыі Сірыі выдало ордэр на арышт былога прэзідэнта краіны Башара Асада, які пасля перамогі апазіцыі ў снежні 2024 года збег у Расію.
Асада абвінавачваюць у наўмысных забойствах і катаваннях людзей і ў правакаванні грамадзянскай вайны.
Прэзідэнт Украіны Уладзімір Зяленскі падтрымаў ордэр на арышт Асада. Таксама ён згадаў і іншых асоб, якія хаваюцца разам з ім у Маскве.
Ён назваў паказальным тое, што найбольш вядомыя забойцы і злачынцы свету хаваюцца ад правасуддзя ў сталіцы беспакаранасці.