Джэймс Кэмеран піша сцэнар новага «Тэрмінатара»
- 6.12.2025, 20:45
Рэжысёр прызнаўся, што тэхналогіі развіваюцца вельмі імкліва.
Джэймс Кэмеран, які зняў першага «Тэрмінатара» больш за 40 гадоў таму, паведаміў, што працуе над сцэнарам новага фільма франшызы. Аднак рэжысёр прызнаецца: тэхналогіі развіваюцца настолькі імкліва, што спаборнічаць з імі ў вымысле становіцца ўсё складаней. Пра гэта ён расказаў парталу Gizmodo.
Рэжысёр пацвердзіў, што ў яго ўжо ёсць «стос нататак» для сцэнару, аднак праца рухаецца з цяжкасцю. Прычына не ў адсутнасці ідэй, а ў тым, што сучасная рэчаіснасць сама па сабе нагадвае кіно.
— Гэта складана, мушу вам сказаць. Навуковая фантастыка нас дагнала і фактычна ашаламляе ў гэты момант, — адзначыў Джэймс Кэмеран. — Мы жывём у навукова-фантастычным свеце, і нам літаральна даводзіцца мець справу з праблемамі, якія раней існавалі толькі ў кнігах і фільмах. Цяпер мы перажываем гэта ў рэальнасці.
Кінематаграфіст з жалем канстатаваў, што паўтарыць эфект свайго прароцкага поспеху 1984 года цяпер практычна немагчыма.
— Я ніколі не буду такім прарокам, якім быў у 1984 годзе, бо не думаю, што хто-небудзь ведае, што адбудзецца праз год або два. Але я, прынамсі, хачу падстрахаваць сябе, зазірнуўшы на пару гадоў наперад, — патлумачыў рэжысёр.
Джэймс Кэмеран плануе з галавой сысці ў пісьменніцкую працу над праектам пасля таго, як скончыць маркетынгавую кампанію свайго новага фільма «Аватар: Агонь і попел».
Нагадаем, у «Тэрмінатары 2: Судны дзень» Кэмеран прадставіў свет, дзе штучны інтэлект стаў настолькі магутным, што даў адпор чалавецтву. А ў нядаўнім інтэрв’ю рэжысёр прызнаўся, што яго палохаюць яго магчымасці. «Калі перайсці на іншы канец спектра, то там ёсць генератыўны ШІ, які можа стварыць персанажа, — працягнуў ён. — Яны могуць стварыць акцёра. Яны могуць прыдумаць гульню з нуля, выкарыстоўваючы тэкставыя падказкі. Не. Гэта мяне жахае. Усё наадварот. Гэта менавіта тое, чаго мы не робім».
У той жа час, паводле меркавання Кэмерана, штучны інтэлект не можа стварыць нешта новае. «Мадэлі… навучаюцца на ўсім, што калі-небудзь было зроблена раней. Яго нельга навучыць на тым, чаго ніколі не існавала. Таму вы, па сутнасці, будзеце бачыць, як усё чалавечае мастацтва і чалавечы досвед змяшчаюцца ў блендар, і вы атрымаеце з гэтага нешта сярэдняе. Таму вы не можаце мець унікальны жыццёвы досвед таго асобнага сцэнарыста і яго дзівацтвы. Вы не знойдзеце асаблівасцяў канкрэтнага акцёра», — цытуе стваральніка фільмаў The Guardian.