Беларускі банк увёў новы спосаб зняцця наяўных у банкаматах

• 6.12.2025, 17:52

Для гэтага картка не патрэбна.

«Белгазпромбанк» запусціў новы сэрвіс выдачы наяўных у банкаматах. Сродкі можна зняць па QR-кодзе. Пра гэта паведамляецца на сайце фінустановы.

«Лічбавы банкаўскі рытм паскараецца. Цяпер, каб зняць наяўныя, дастаткова паднесці ваш гаджэт з усталяваным на ім дадаткам DailyFin да спецыяльна пазначанага банкамата «Белгазпромбанка» — і больш ніякіх пластыкавых картак і PIN-кодаў», — тлумачыць банк.

У фінустанове ўдакладняюць, што гэты спосаб зняцця наяўных можа быць карысны тым, у каго скончыўся тэрмін дзеяння карткі, а таксама тым, хто забыў PIN-код ад яе.

«Новы сэрвіс стане памочнікам для ўладальнікаў прылад Apple, дазваляючы атрымаць наяўныя сродкі звыкла, маючы ў руках толькі тэлефон», — паведамляе банк.

Як гэта працуе

Трэба выбраць на экране банкамата функцыю «выдача наяўных па QR-кодзе». «Увайдзіце ў дадатак DailyFin і адскануйце убудаваным сканарам QR-код на экране банкамата, — тлумачыць банк. — На гэтым этапе неабходна ў дадатку выбраць рахунак (націскам на выяву патрэбнай карткі), даступны для ажыццяўлення аперацыі выдачы наяўных сродкаў».

Пасля гэтага на экране банкамата трэба выбраць даступны від валюты і ўвесці суму, якую неабходна зняць. «Пацвердзіце аперацыю ўводам SMS-кода, які прыйдзе на ваш мабільны тэлефон (указаны пры рэгістрацыі ў DailyFin), у адпаведнае поле інтэрфейсу банкамата», — дадае банк.

Але ёсць абмежаванні па зняцці наяўных з рахунку па QR-кодзе: за суткі — 500 рублёў (13000 расійскіх рублёў, 150 долараў, 130 еўра, 600 злотых, 1100 юаняў. Таксама ёсць абмежаванне па суме на працягу чатырох сутак.