У Польшчы расказалі, чаму ў краіне прагучала паветраная трывога

• 6.12.2025, 15:55

Сігнал прагучаў падчас атакі РФ супраць Украіны.

У Любартскім павеце Люблінскага ваяводства Польшчы афіцыйна патлумачылі прычыны ранішняй актывацыі сірэн паветранай трывогі, якая апынулася ілжывай.

Пра гэта піша RMF24.

У заяве, абнародаванай павятовымі ўладамі, інцыдэнт назвалі вынікам «чалавечай памылкі» і неправеранай інфармацыі.

Сірэны прагучалі каля 05:30 раніцы 6 снежня пасля таго, як раённы крызісны цэнтр паведаміў пра «неадкладную паветраную пагрозу» для Любартскага павета.

Работнікі неадкладна перадалі рэкамендацыю ўключыць сірэны ў дзевяці муніцыпалітэтах: Любарт, Аструў-Любельскі, Усцімуў, Фірлей, Міхув, Камянка, Абрамув, Езержаны і Нядзьвяда.

Аднак пасля прыбыцця супрацоўнікаў цэнтра ў раённую адміністрацыю і дадатковай праверкі інфармацыі з ваяводскім крызісным цэнтрам у Любліне высветлілася, што паведамленне пра пагрозу не пацвярджаецца.

«Згаданая вышэй памылка была выклікана чалавечай памылкай», — гаворыцца ў заяве.

Дзяжурны афіцэр ваяводскага цэнтра не выявіў даных пра магчымы паветраны напад. Пасля гэтага мясцовым муніцыпалітэтам далі ўказанне скасаваць трывогу паўторным уключэннем сірэн.

Улады павета адзначылі, што ілжывае апавяшчэнне не грунтавалася на афіцыйных даных ад ваяводскіх службаў, а паходзіла з неправеранай крыніцы са стрымінгу. У адказ на інцыдэнт апавясцілі адміністратара павета.

Гэты інцыдэнт адбыўся на фоне масіраванага расійскага ўдару па рэгіёнах Украіны, у выніку якога Польшча падымала ў паветра сваю авіяцыю.