У Польшчы прагучалі сірэны паветранай трывогі

• 6.12.2025, 13:52

Падчас масіраванай атакі РФ на Украіну.

У польскім горадзе Любартув, які знаходзіцца ў Люблінскім ваяводстве, раніцай 6 снежня прагучалі сірэны паветранай трывогі з-за небяспекі на фоне камбінаванай атакі Расіі на Украіну.

Пра гэта піша RMF24.

Сірэны ў Любартуве спрацавалі пасля атрымання інфармацыі ад раённага крызіснага цэнтра.

Мэр горада Кшыштаф Пасьнік паведаміў, што сігнал уключылі з-за абстрэлу Украіны. Паводле RMF24, цэнтр атрымаў паведамленне з іншага раёна пра набліжэнне да горада невядомага аб’екта.

Праверка доўжылася каля паўтары гадзіны, але рэальнай пагрозы не выявілі і трывогу адменілі, адзначыла выданне.

Цяпер высвятляюцца абставіны інцыдэнту, у прыватнасці правяраецца магчымасць дэзінфармацыі.