Чарговы пшык

• Аляксандр Качаткоў
• 6.12.2025, 10:26

Зяленскі не ідзе на кампрамісы.

Чарговы раўнд прымушэння Украіны і Расіі да міру, гучна анансаваны Белым домам як суперпаспяховы, скончыўся чарговым пшыкам. Настолькі відавочна, што нават была адменена сустрэча Д. Кушнера і С. Уіткофа з прэзідэнтам В. Зяленскім для абмеркавання вынікаў візіту амерыканскай дэлегацыі ў Маскву. Адменена, бо абмяркоўваць няма чаго.

Наколькі вядома, Пуцін працягвае настойваць на сваім: выхад ЗСУ з Данбаса, прызнанне ЗША Крыму і Данбаса расійскімі, скарачэнне ЗСУ да 300–600 тысяч, змена Канстытуцыі Украіны адносна ўступлення ў НАТА. Далей — доўгі і цяжкі тарг адносна замарожвання лініі фронту, якую цяпер надзвычай цяжка вызначыць.

Трамп спяшаецца, нават зяця да працэсу далучыў, бо яму вельмі хочацца атрымаць тую Нобелеўку, якая даўно ператварылася ў фетыш. Пуцін перакананы, што яму няма куды спяшацца: ва Украіне палітычны крызіс, ён спадзяецца, што ён негатыўна адаб'ецца на здольнасці ЗСУ супрацьстаяць агрэсару. І Расія зможа захапіць больш тэрыторый (ва Украіне лічаць, што наадварот, хоць дзеля гэтага нічога не робіцца).

Прэзідэнт Зяленскі не ідзе на кампрамісы, бо для фіналу палітычнай кар'еры яму толькі мяккай капітуляцыі не хапала, у дадатак да карупцыйных скандалаў. І ўвогуле, ствараецца ўражанне, што пасля правалу контрнаступлення 2023 года Зяленскі больш спадзяецца на свой легендарны фарт, чым на рацыянальныя падыходы.

Што далей? Логіка Трампа, які перакананы, што яму проста подла перашкаджаюць атрымаць даўно належнае, прадугледжвае ўзмацненне ціску. Вядома, на Украіну, бо на недаімперыі ён плануе зарабляць. Таму варта чакаць, што будуць новыя шакавальныя разаблачэнні адносна карупцыі ва Украіне. Але яны будуць датычыцца ўжо не ўмоўна ўкраінскіх грошай у энергетыцы, а заходніх грошай на вытворчасць зброі і фінансавае забеспячэнне ЗСУ і гэтак далей. І будуць закранаць ужо В. Зяленскага, хоць верыць у тое, што яго можна зачапіць, мне не хочацца.

Аляксандр Качаткоў, «Фэйсбук»