Расія нанесла масіраваны ракетны ўдар па Украіне

• 6.12.2025, 10:07

Атакуюць украінскія гарады і дроны.

Расійскія акупанты яшчэ з ночы наносяць паветраныя ўдары па Украіне. Цяпер трывога абвешчана ва ўсіх абласцях. Ужо ёсць звесткі пра параненых і пашкоджанні чыгуначнай інфраструктуры, піша unian.net.

Паводле даных Паветраных сіл, для паветранай атакі расіяне задзейнічалі як беспілотнікі, так і ракеты. У прыватнасці, большасць абласцей падвяргаецца атакам беспілотнікаў. Таксама армія РФ здзейсніла пускі крылатых ракет са стратэгічных бамбавікоў.

На дадзены момант у Луцку па дронах працуе супрацьпаветраная абарона, паведаміў гарадскі галава Ігар Палішчук. Пазней мэр дадаў, што ў горадзе раздаўся выбух. Узгарэліся харчовыя склады ў адным з мікрараёнаў горада.

Таксама «Шахеды» ляцяць на Староканстанцінаў.

Акрамя таго, «Укрзалізниця» паведаміла, што ў сувязі з масіраваным абстрэлам чыгуначнай інфраструктуры ў Фаставе аператыўна змяняюцца маршруты пасажырскіх цягнікоў, якія павінны былі праходзіць праз горад.

«Затрымкі пакуль кантралюемыя, а нашы дыспетчары паклапоцяцца пра магчымыя перасадкі. Просім уважліва слухаць аб'явы чыгуначнікаў на вакзалах і ў цягніках. Рух не спыняецца», — гаворыцца ў паведамленні.

На дадзены момант, паводле даных Паветраных сіл, ракеты ляцяць курсам на захад, а таксама на Кіеўшчыну.