Украіна пракаментавала новыя перамовы ў ЗША

• 6.12.2025, 8:49

Умераў і Гнатаў два дні размаўлялі з Уіткафам і Кушнерам.

Цягам двух дзён Спецыяльны пасланнік прэзідэнта ЗША па пытаннях міру Стывен Уіткаф і Джарэд Кушнер правялі сустрэчу з Сакратаром Савета нацыянальнай бяспекі і абароны Украіны Рустэмам Умеравым і начальнікам Генеральнага штаба Узброеных Сіл Украіны генералам Андрэем Гнатавым. Пра гэта паведаміў сам Умераў.

Паводле яго слоў, сустрэча была засяроджаная на прасоўванні рэалістычнага і дзейснага шляху дасягнення трывалага і справядлівага міру ва Украіне.

«Адбылася шостая сустрэча бакоў за апошнія дзве тыдні. Пацвердзіў, што прыярытэтам Украіны з'яўляецца ўрэгуляванне, якое гарантуе абарону незалежнасці і дзяржаўнага суверэнітэту Украіны, бяспеку ўкраінцаў і фармуе стабільную аснову для паспяховай дэмакратычнай будучыні», — адзначыў ён.

Умераў сцвярджае, што ўдзельнікі абмеркавалі вынікі нядаўняй сустрэчы амерыканскага боку з Расіяй і крокі, якія могуць прывесці да заканчэння вайны. Сакратар Савета нацыянальнай бяспекі і абароны дадаў:

«Амерыканскі і ўкраінскі бакі таксама ўзгаднілі рамкі дамоўленасцяў у сферы бяспекі і абмеркавалі неабходныя сродкі стрымлівання для забеспячэння ўстойлівага міру. Абодва бакі падкрэслілі, што сапраўдны прагрэс у дасягненні любых дамоўленасцяў залежыць ад гатоўнасці Расіі прадэманстраваць рэальную прыхільнасць доўгатэрміноваму міру — у прыватнасці, зрабіць крокі да дэскалацыі і спынення забойстваў».

Ён акцэнтаваў, што амерыканскі і ўкраінскі бакі адзначылі, што завяршэнне вайны і рэальныя крокі да спынення агню і дэскалацыі неабходныя для прадухілення новай агрэсіі і для забеспячэння рэалізацыі комплекснага плана аднаўлення Украіны.